2018年6月5日 星期二

由布院 (湯布院)


想去由布院既朋友有福喇, 因為自2018年7月14日開始, 去年因大雨而損毁既路段將會重開, 車程會由依傢既三個半鐘減到兩個鐘左右.  不過幾多個鐘都好, 大家係咪好想知道, 由博多來回由布院係咪可以即日來回呢? 答案係: 得! 因為我試過. 方法最尾先講, 出發去由布院先!



JR由布院周邊




離開由布院車站之後, 眼前既景物係好似下面咁既:



其實大家只要沿住眼前呢條路, 一路直行就可以去到今集既目的地 湯の坪街道.  而從呢個方向計望去右手邊, 就係由布院遊客中心.



呢度有冷氣, 可以入黎坐低休息下, 另外仲有行李寄存服務, 同埋....租單車, 馬車, 同觀光老爺車.


馬車收費係每位¥1600, 佢會載你遊由布院一個圈, 大約45分鐘就會再返黎火車站呢度落車. 觀光老爺車同樣, 收費就唔記得喇. 另外踩單車都係好做法, 因為路程都幾遠. 有幾遠? 要行半個鐘架!
左手邊係由布院駅, 右手邊有個叫金鱗湖既就係今集景點既尾站. 要行半個鐘先到.


比個清楚啲既地圖大家睇, 由布院大部份既食肆同店鋪都位於湯の坪街道入面 (地圖紫色線).

我地由由布院駅開始出發,


呢間鋪賣既野幾特別, 值得一睇. 一出火車站附近就係.




人力車勁貴!! 我都係坐馬車算.


火車站行出黎呢條街叫由布見通り, 沿途都有特色店鋪可以行下, 反正你點要行到尾, 一路行一路睇.



過左條河之後就要小心, 唔再行大街, 反而係右手邊條小路先係. 



湯の坪街道


呢條小路就係今集既重點, 湯の坪街道喇. 


呢條街沿都有幾個收費停車場, 普遍都係¥200全日任泊. 所以你求其Google一間鋪個電話用黎做GPS Code就黎到.

真係成間都賣Mochichi



雪糕好食!!!


有睇九州攻略既朋友, 杜如風介紹過呢間木製品既店鋪. 我用一個字黎形容: 貴! 最平既野都要¥5000起錶. 而除左木製品之外, 入面仲有啲皮革野, 黎如錶帶, 銀包等等.




呢個係由布院必食既小食, 好似釋做可樂餅. 不過其實有好多隻味, 有芝士, 有和牛等等. 勁好食!!





SNOOPY茶屋, 有冇SNOOPY迷想去?


跟住落黎, 我會重點介紹幾間特色店鋪比大家:


どんぐりの森



どんぐりの森同香港或者日本大家成日見到既どんぐり共和國係不同公司營運的. どんぐりの森少分店好多, 所以難得黎到由布院記得入去參觀下. 佢地之間既分別, 係どんぐりの森賣既野種類比較多, 連家品, 盆栽都有.



千圓之藏





話明係千圓, 店內所有野都係¥1000. 除左少量香港見到慣既淘寶電話電腦配件之外, 其實都幾多特色野, 背包, 手鏈都有. 另外, 由布院呢度啲店鋪, 好多都有上圖呢個憑收據, 去貓Cafe有八折既優惠. 我試過, 係真既. 無任何附加條款, 日本人真好.  喺由布院呢度, 有兩間貓Cafe, 一間貓頭鷹館. 當中貓Cafe陣間講, 貓頭鷹館就睇番杜如風既九州攻略啦.


湯の坪橫丁




好似第一幅相咁樣, 呢度係一個有幾間餐廳圍成既一個角落. 當中有幾間小店可以行下. 另外仲有一間係玩小魚咬死皮既, 不過呢樣野我由泰國篇已經叫大家千萬不要試!!


貓屋敷 / 犬家敷




行到近街尾, 有兩間打對面既鋪非常特別, 一間賣貓賣狗....既製品. 咁當然唔係講貓砂狗糧呢啲寵物野, 佢係賣貓樣同狗樣既精品, 杯杯碟碟, 袋, 等等乜野都有. 貓屋敷既二樓仲有真貓比你睇添.


ガラスの森 / オルゴールの森 (玻璃之森 / 音樂盒之森)





呢間鋪喺由布院非常出名, 地下嗰層係玻璃之森, 二樓係音樂盒之森. 唔買都入黎睇下, 幾靚架. 特別係音樂盒之森, 佢啲音樂盒既歌曲係連AKB48, 宇多田光既歌都有. 近年出名既流行曲包括星野源都有.


湯布院昭和館






其實日本好多地方都有昭和館, 同香港一樣, 賣集體回憶就一定值錢, 所以入呢個館要比錢, ¥500一位. 


挪威森林貓Cafe






上文講到, 呢度有兩個貓Cafe, 一間係玩孟加拉貓既, 一間係玩挪威森林貓既. 由於我自己都係養長毛貓既關係, 我去左挪威森林貓Cafe, 入面有接近10隻貓比你玩, 你可以用現場提供既玩具, 例如貓棒, 波波等等同貓仔玩. 又可以摸佢, 只係唔可以從地下抱起佢.
上文講到, 憑購物收據黎貓Cafe有八折, 折完¥700一位, 包一杯飲品, 自己揀, 添飲都係¥180杯. 拎杯野出黎之後記得要用杯蓋, 貓仔好多野唔飲得大家知架啦.


金鏻湖




據著名泊車網站泊好先既版主介紹, 呢個湖由於水溫係暖暖地既關係, 所以每朝早天氣凍而水溫暖既情況下, 水面就會出現霧氣, 形成一幅仙景圖. 所以大家想影靚相要晨早黎呀!


Yufuin Floral Village 由布院童話村


時間既關係, 我係無去到呢條村的. 上文講到, 由布院有兩間貓Cafe, 一間貓頭鷹館. 當中既孟加拉貓Cafe貓頭鷹館就係喺呢條由布院童話村入面. 入面既設計好似去左英國童話世界咁, 仲有飄零燕等你添. 下次有時間我一定會再去, 到時再補番相比大家睇.


最後, Y爺為大家準備左幅地圖, 等你地去由布院既時候, 大約都知啲鋪頭位置.




由布院之森


講完由布院, 梗係要講埋由布院之森啦, 話晒都係九州鐵路既一大景點. 由布院之森係來往博多由布院特急列車, 話明特急列車, 當然要加錢同埋要預早劃位.  不過, 如果你係有買JR九州PASS的話, 呢程特急係包埋架 (唔需要另外加錢). 大家只要去番  <<福岡篇 - 博多駅周邊>> 呢篇文章就可以搵到點樣去JR博多站既櫃台劃位.

綠色既座位, 配搭木紋既天花, 好似去左森林咁. 配合番由布院之森呢個主題.

玻璃門都靚過人.

由於由布院之森想大家坐高啲. 所以上車之後, 你要行幾級樓梯, 再穿過呢條天橋先可以行入車箱. 非常特別. 呢條橋又係景點黎架. 記得影相.

火車都有落地玻璃, 死未? 所以佢先要設計成高車身.

張枱又靚過人

呢卡係餐車. 一開車就開始營業, 呢個時候非常多人. 個個都無食早餐嗎?

職員會派呢張記念乘車証比大家, 記得攞. 但係我見好多人懶得攞.

咁長既車程, 梗有啲 "花臣" 既玩. 列車行到咁上下, 有位職員會拎住呢個日期牌逐個位咁比你地影相, 佢會幫你揸機架喇, 你較好晒光暗White Balance就放心交比佢啦.




交通指南:
2018年7月14日開始, 原本因大雨而損毀既路段已經重新修理好, 到時每日有6對列車行駛, 即日來回博多由布院綽綽有餘, 班次如下: (詳情請留意JR九州官網>> https://www.jrkyushu.co.jp/chinese/train/yufuin_no_mori.html)

博多出發 由布院到達 列車終點站
(經由布院)
由布院出發 博多到達 列車發車站
(經由布院)
7:45 10:01 別府 9:07 11:20 大分
9:24 11:36 由布院 12:09 14:16 由布院
10:24 12:34 別府 14:17 16:33 別府
12:20 14:42 別府 15:50 18:06 別府
14:35 16:44 由布院 17:08 19:18 由布院
18:36 20:48 大分 19:24 21:33 大分

博多站入面既呢個入口入去, 就可以去到由布院之森既月台架喇.

如果你係2018年7月12日或之前去既朋友. 由於每日得2班車既關係. 所以如果你想即日來回就要搭各停大分, 再轉特急列車博多. 由由布院大分約55分鐘(一定係各停, 無快車),  而由大分博多車程約2小時 (一定要搭特急).
再提提大家一件好重要既事, 就係2018年7月13日係完全無由布院之森服務的!!!  Plan行程時要小心呀!!



隨左搭鐵路之外, 其實大家仲可以搭長途巴士黎由布院. 由博多 (博多巴士總站) 黎由布院, 車程約3小時. 一般黎講, 大家去旅行實會買JR九州PASS, 所以我當資訊咁比大家得個知字算. 


註: 本文地圖取材自谷歌地圖

沒有留言:

張貼留言