2018年5月29日 星期二

福岡篇 - 中洲川端


多數遊客去福岡, 唔係去博多就係去天神. 但係你唔覺點解行極都唔見有間驚安?  個個都話去天神食屋台. 但係你成日睇電視睇旅遊書都係影上面呢種喺條海旁邊既屋台. 但係行晒成個天神都搵唔到條河? 因為天神屋台根本唔喺天神! 咁喺邊? 答案: 中洲.




中洲位於天神博多既中間, 搭地鐵既話, 可以去中洲川端站落, 一出閘, 搵4號出口, 我地去左第一個目的地先, gate's商場.


gate's



一出閘, 4號出口就去到gate's商場, 打風落雨都唔怕, 呢度最重要得兩樣野, 就係2樓既驚安之殿堂, 同埋3樓既無添加くり寿司.


24唔係指24小時, 只係話佢收零晨十二點. 呢間野出名勝價比高, 我曾經寫左一篇文章介紹佢, 有興趣可以去睇下 >> 無添加くら寿司.



呢間驚安雖然得一層, 但係已經足夠你行有餘. 點解人人去日本都總係鐘意行下驚安? 除左平之外, 佢的確有好多新奇有趣既野, 先講下第一張相, 成個櫃咁大既汔車用香精羨慕嘛? 下圖係一個用USB既迷你燙斗. 著西裝去公幹既人就岩晒.
離開商場之後, 望下佢斜對面就會見到另一個商場, Hakata Riverain Mall.


Hakata Riverain Mall (麵包超人兒童博物館)





黎得呢個商場通常都係去兩個地方, 一係去福岡亞洲美術館, 一係去麵包超人兒童博物館.





行完之後, 離開商場望下對面, 又有野行, 就係川端通商店街.

川端通商店街 (KAWABATA)


川端通商店街有過百年歷史, 所以賣啲野都幾平民同幾古老下. 不過反正要去中洲屋台, 穿川端通商店街行過去, 起碼唔駛淋雨先.




磯丸水產喎!! 不過呢間太細, 加上早收門, 我帶大家去間大啲同24小時既.

河邊有廁所? 呢個廁所令我諗起男生圍木橋嗰個廁所. 一百年前會唔會好開掦既呢?


中洲屋台

一路行到尾, 見到條大馬路就轉右, 向住條河既方向行, 就會見到目的地中洲屋台. 呢個地方就係平時大家睇電視睇旅遊書見到河邊屋台既地方. 不過咁, 大家睇相都見到, 由於呢度做緊河務工程, 所以啲屋台搬前左幾十米. 

講到呢度停一停先, 因為我身後既位置, 就係24小時營業既磯丸水產, 容我介紹左先.







磯丸水產出名平靚正, 一個雜錦海鮮丼都係一百蚊港幣以內. 雜錦真係原片魚生黎架!! 唔係香港嗰啲海鮮粒. 去日本就無理由唔食, 你睇下碗魚湯幾足料, 另外燒海鮮都係佢既招牌菜, 大家經過就試下喇. 食完之後, 去屋台搵小食.


唔知係咪河務工程既原因, 呢度得四五檔有開業, 可能夜啲黎會開多幾檔既. 另外就係, 所有去過九州既朋友都話, 屋台啲野食太貴又唔見得好食. 就呢點我都有去研究下, 發覺價錢較平既, 就經常爆滿. 另外, 太多檔口賣豬骨拉麵同餃子. 呢兩個我又無乜特別興趣, 食魚生都食飽啦.

最後, 比多次地圖大家睇.
其實中洲屋台行到尾, 穿公園過條天橋仔, 就去到運河城. 步行都只不過係5分鐘. 所以你可以調番轉, 去完運河城先行過黎宵夜都得. 亦都因為咁, 當地既地鐵其實係教人用中洲川端站5號出口行去運河城, 而唔係教人由博多站行去的. 都係嗰句, 你識路既唔教你都識去, 唔識路既, 易搵路不過遠啲都總好過近啲不過難搵路.

後記: 其實中洲呢個地方係福岡歌舞伎町, 周圍啲橫街小巷都係夜總會同案內所. 所以呢度行街, 特別係夜晚, 唔好行差踏錯. 唔係話有人會打劫你咁誇張, 但係品流複雜或者遇到醉酒佬都唔好啦. 所以沿大馬路同川端通商店街行就安全得多.


福岡篇相關文章:
天神


沒有留言:

張貼留言