2018年5月17日 星期四

博多必食串燒店 - 夢市門


黎到日本, 除左魚生、燒肉、拉麵之外, 當然要試下串燒啦. 好彩多得好友食玩遊蹤 by 海藍的生活旅程 seablue.hk既推介, 可以食到呢間又平又抵又好食既串燒店. 有幾平? ¥50一串雞皮夠唔夠平? 一齊黎睇下啦.





呢間串燒店叫做夢市門, 喺九州有兩間分店. 當中呢間最就腳. 由博多站行過黎都唔駛10分鐘, 或者你由運河城行過黎都得, 都係10分鐘內就到. 但係平靚正既鋪當然唔會開喺大街大巷架啦, 唔擔心, 我準備左地圖比大家, 容後再講.








講下串燒先, 呢度雞牛豬羊呢啲普通野當然有, 價錢大約係¥150一串, 當中我最鍾意食帶子串燒, 都係¥150. 此外, 仲有啲貴少少既串串, 包括芝士煙肉串就¥250. 點計都平過香港喇掛?

除左串燒之外, 海藍仲試埋佢地既馬肉刺身, 仲話味道唔錯添. 我就唔敢食喇, 留番比大家試.

提提大家, 呢度只係收現金. 另外由於地方唔太大, 一係預早六點左右黎食, 一係夜少少黎食宵夜, 否則分分鐘無位架!! 亦都因為呢度係平民食肆, 所以全店都可以食煙的. 唔食煙既朋友要忍忍, 專心食野啦. 餐牌方面, 店主提供左英文同韓文餐牌比遊客使用, 香港朋友就問佢攞英文餐牌啦.


交通指南:



最易認路同快捷既方法, 就係跟住上圖紫色箭咀線咁, 由博多站出發, 過馬路去西日本銀行既方向, 喺佢左手邊條街行入去, 之後你會見到個公園, 對角穿過去, 再行第二個街口就到.


上圖右手邊橙紅色嗰座就係西日本銀行.

穿過公園後行兩個街口, 夢市門就喺正路口角落, 好明顯.


鳴謝: 食玩遊蹤 by 海藍的生活旅程 seablue.hk 提供相片及資訊



福岡篇相關文章:


註: 本文地圖取材自谷歌地圖

沒有留言:

張貼留言