屯門 T Park 浸SPA

無錢去日本，又想浸溫泉。點算好？唯有留喺香港浸啦，仲要免費既添，夠唔夠著數？會唔會好多人？點預約？點樣去？一齊黎屯門 T Park 玩下啦。

T Park是什麼？

T Park 類似日本大阪既垃圾焚化設施，不過大阪嗰個係燒垃圾，屯門呢個係燒污泥。而喺燒污泥期間產生既熱力，就會用黎轉化為電，除左可以自給自足咁供應比番T Park自己用之外，有剩既電仲會流番出去供電網比屯門一帶既居民使用。係非常有意義既設施。

呢度有幾個園區，一入門口就有源‧林。

源‧林除左上圖呢個噴泉做裝飾之外，旁邊仲有個公眾暖水足浴池。方便黎參觀既朋友，而又未夠鍾上車既話，就可以喺呢度浸下腳。

而進入左大樓範圍之後，就會到達源‧館、源‧臺等等既設施。

簡單講，呢度就好似科學館咁，比你一路行，一路睇下呢座轉廢為能設施既運作同原理。你仲可以隔住個玻璃咁望到真實既運作。而如果你係黎參加導賞團既話，更加有機會親手玩下同即場飲下由污水淨化而成既食水添。（你敢飲既話😰）

而最靚既，應該係天台，源‧臺。

對面就係深圳喇。

離開左座大樓之外，仲有一個景點，叫源‧湖。

跟據資料所講，大家隔住個欄見到既呢個湖就係源‧湖，呢度係雀島保護區，有好多自然野生雀鳥咁話喎。你見到有就有啦。

源‧茶，故名思義，呢度係食Tea既地方，食物唔算太貴，又唔見得平咁囉。而最最最小心既係，呢度所有餐具都係要你自己洗番的。我當日係食完還碟先知，否則應該臨食之前洗多次，否則.......我都唔想再講落去。太嘔心。

而最後，當然黎到本文既重頭戲，源‧泉浸SPA喇！！！

由於SPA入面唔容許影相，所以我淨係影左上面呢張圖再加文字解釋比大家聽啦。

首先，源‧泉入面有三個池，分別係一熱一暖一凍。以我浸既時候溫度計顯示既水溫黎計，分別係42度池、22度池同埋16度池。拿，我已經好醒目咁臨入冬既11月尾先黎浸，當日溫度係18度左右。浸42度池係非常正！！而42度池亦都係最大嗰個，而亦都係因為呢度既水係真真正正來自大海直接化淡既關係，所以呢個42度池係有礦物鹽既成份，真係好爽架！！
而跟據指示，最佳既浸法係10分鐘熱水，再10分鐘凍水，又再10分鐘熱水咁浸。不過當日我最盡都係浸到22度池，個16度池淨係放隻腳入去已經冰咁凍，下次夏天先黎挑戰佢啦。

源‧泉呢度係男女共浴的。所以一定要著泳衣（可外加白色T Shirt）落水。同埋呢度講明唔比游水，只可以浸水。所以個個入到去都會霸番個地方，自己浸。同一時段內最多都係廿幾人左右，所以空間感十足，唔會浸到人貼人，放心去浸啦。另外提提大家，由於更衣室係極細既關係，大家唔駛咁心急一夠鐘就衝入去。我見大部份人浸半個鐘左右都已經浸飽晒起身走人，所以你可以開場後15分鐘先去慢慢換泳衣，出到去水池時啲人都走得七七八八了。

成個T Park除左星期二休館之外，每日都有五個浸SPA既時段，由朝早10:15開始，到最尾一節17:30，每節75分鐘。真係浸到你甩皮都得。我就係浸17:30嗰節既，好處係可以從落地大玻璃望住深圳灣同日落，個感覺就好似天光浸到天黑咁。好正架。有興趣既朋友，去以下網址預約啦。
https://booking.tpark.hk/?lang=tc

整個T Park既詳情可以上官網 (https://www.tpark.hk/tc/) 了解。最後提提大家，預約時除左要留意時段之外，仲要留意交通安排。雖然 T Park 有免費泊車，不過免費泊車有時段限制，而最衰既係佢個時段係唔夾你浸SPA的。所以經常出現Book到SPA，但係Book唔到車位既問題。如果唔揸車黎既話，T Park提供左免費穿梭巴士來回屯門站（V City），車程30分鐘。所以你泊部車喺V City都係好選擇。因為 T Park 位於屯門垃圾堆填區旁邊，你揸車去出番黎之後，部車好似去過地盤咁，全部車都係沙塵同泥。加上，大家睇地圖都知路途幾遠架啦，由屯門碼頭開始計都要揸十幾分鐘車。


後記:
唔知大家睇相時有冇覺得熟口熟面呢?  因為T Park係TVB電視劇白色強人既其中一個拍攝地, 劇入面醫院走廊同埋醫院停車場既場景就係喺T Park 呢度拍架喇.