2017年3月24日 星期五

草津溫泉


草津, 係一個全年都好凍既地方. 由於佢處於海拔1200米高既高原地區 (東京既Sky Tree都係634米咋!!), 呢度就算係夏天都只不過係18度左右. 所以一年四季都好適合浸溫泉. 除此之外, 草津既湯畑係一個好有特式既景點, 而整個草津都係圍繞住呢個湯畑黎做中心的. 所以好多人去完又想再去, 令草津溫泉連續多年黎做係日本人至愛溫泉既No.1 !!!!


湯畑





當你山長水遠黎到草津巴士總站之後, 沿湯畑出口方向出, 就會去到上圖既巴士總站正門, 過條馬路過對面. 一路行落去, 5分都唔駛就到湯畑架喇, 非常方便!!


眼前就到喇!!







唔講你唔知, 草津呢度既溫泉水有成95度咁熱, 所以根本就唔適合用黎浸, 所以當年啲人就起左呢個湯畑, 用黎灘凍啲水. 除此之外, 仲有一個人工既方法用黎整凍啲水, 就係下面呢個收費表演喇, 一場黎到一定黎 "熱乃湯" 睇表演呀!

每日有六節表演時間, 每節約30分鐘. 收費成人每位¥600.



片段入面最後既部份, 就係草津既特點, 手攪溫泉水喇, 唔好睇佢係咁二攪下攪下喎, 佢攪完之後係可以將水溫由95度降到去55度! 當年呢啲工作就梗係女人做架啦, 而浸既就係男人, 女人無份浸架, 所以現今社會大家幾幸福. 講到呢度, 你唔係咁都信佢地攪幾下就會攪凍啲水下? 其實仲有一樣最後武器的, 不過我唔開估喇, 大家黎到草津比錢入場睇答案啦. 


西の河原公園 及 西の河原通り



睇完表演, 係時候行下街喇, 呢度無乜野好行, 唯一可以行下呢條西の河原通り, 沿住呢條路仲可以行到去西の河原通公園添.




全木做既龍貓共和國, 感覺上同平時見到既自然好多.





行左十分鐘左右, 終於黎到西の河原公園既周邊.......仲要再行多五分鐘呀!













唔駛試喇, 呢度啲水一定係熱架啦, 當日天氣大約一兩度左右, 但係啲水依然係辣手架!! 要玩水記住試左水溫先. 


呢個公園好大, 兩旁都係山同樹, 所以黎呢度航拍就一流. (草津係容許航拍既地區黎架. 東京就千萬不要飛, 即拉!!) 除此之外, 呢度仲有一個西の河原大露天風呂. 我就無入去喇, 不過我見好多外國人入去.



吾妻燒肉


天寒地凍, 當然食燒肉對住個爐最好啦, 跟住我又有平靚正既野食介紹喇. 湯畑旁邊有一間好迷你既地道燒肉鋪, 又平又好食. 上圖見到既係兩個一人餐, 每個餐有一款肉類, 少量雜菜, 一大碗白飯同一碗味噌湯, 兩個人加埋都係三百幾蚊港紙. 我地再叫幾串串燒, 都唔駛四百蚊. 超平!!!



上圖湯畑旁邊呢間就係喇, 門口賣串燒的. 唔好去錯呀, 再隔離上樓上仲有一間又係叫吾妻乜乜燒肉貴好多架.



大滝乃湯 (公共溫泉)







食飽之後, 行一陣又可以去浸溫泉喇. 草津呢度有一個收費既公眾溫泉好出名, 講到必黎咁滯, 就係大滝乃湯喇.
由湯畑沿落山既方向 (即係上面吾妻燒肉個方向, 沿路有指示牌的) 行8分鐘左右就到. 入場費係每人¥900. 行咁遠先去到, 我就無入去喇, 因為我間酒店喺正湯畑旁邊, 房入面仲有私人露天風呂添, 公眾既你地去啦, 哈.  溫泉又浸完, 沿住湯畑周圍行下搵野玩喇.



日本人真好識與眾同樂, 湯畑旁邊有個腳湯.







難得溫泉區都有得夾公仔, 不過啲公仔就......



草津國際スキー場 (滑雪場)





草津呢度除左浸溫泉之外, 滑雪都好出名, 搭町內巡回巴士, 15分鐘車程就可以黎到, 我就唔識滑雪既, 過黎都係為左實地介紹比大家睇, 感動嗎?



草津呢度話大唔大, 但係要行就幾吃力, 話晒都係山路丫. 所以呢度有草津溫泉町內巡回巴士, 每程只需¥100, 由草津巴士總站出發, 經湯畑, 大滝乃湯, 滑雪場, 再返番去草津巴士總站. 咁樣由頭坐到尾都只需30分鐘, 所以根本就好細. 滑完雪想返番去湯畑既話就要喺草津巴士總站落, 自己行番落去喇. 詳細可以睇下下面個地圖.



交通指南

前往草津溫泉最快捷方便既方法, 就係由東京搭新幹線去輕井沢 (車程1小時10分鐘), 轉巴士(1小時40分鐘至1小時50分鐘左右)直達草津溫泉巴士總站





輕井沢篇既時候講過, 要搭巴士去草津或者白絲瀑布, 出左閘之後係由北口出, 行去2號月台就係, 大約一小時一班車. 提提大家, 雖然日本既巴士係有得找續, 但係5000及10000日元係唔收架!!! 所以如果你無細紙既話, 臨上車前, 去輕井沢既旅客服務中心, 佢係可以唱錢比你的. 記住喇, 我每次搭巴士見到香港人十個有九個都錯呢樣野.

打算自駕遊既朋友, 可以由上野搭JR高崎線之草津特快前往長野原草津口站(車程約2小時30分), 就有租車公司喺附近, 由呢度揸車去草津約30分鐘.

提提你, 千萬不要由輕井沢租車前往草津!!!!
因為由輕井沢去草津, 中途要經過白絲瀑布既一段收費山路, 係又窄又斜, 加上山路有大半年時間都有積雪, 香港人無呢方便經驗揸唔掂的. 何妨要比路錢, 不如由長野原草津口租車去好過啦.

最後, 由於要搭新幹線既關係, 所以記得要買PASS, 最平既JR東京廣域周遊券都搭得架, 連續3日任搭JR都只需¥10000. 唔夠用既話, 當然可以買JR EAST 5日或7日既PASS啦.


(註: 本文地圖取材自谷歌地圖)

沒有留言:

張貼留言