沖繩菠蘿園

無論係讀者定係我朋友, 個個都問我點解去咁多次沖繩都無去過菠蘿園 (正名係: 名護鳳梨公園). (咁我真係唔係話好鍾意菠蘿嘛, 點會專登去?) 上集介紹左大家去森之玻璃館, 反正就喺菠蘿園附近, 好喇好喇, 為左呢個Blog, 就去影幾張相比大家睇下啦......

黎呢度一定要渣車 (GPS請輸入電話號碼 0980533659), 上圖其實係停車場既一角, 免費任泊的. 呢部菠蘿車好似可以坐架喎, 但係唔知點坐, 反正入口就喺停車場旁邊, 行兩步就到.

入場費係￥850, 呢度同古宇利島一樣, 比完錢第一樣野玩既就係坐哥爾夫球車.

由於我係九月去既關係, 岩岩撞正菠蘿生長期, 所以上面既相所睇到既菠蘿仲幾過個五蚊.
呢程車大約15分鐘, 佢會帶你去幾個唔同既景區睇花草樹木 (其實係比機會你餵蚊 =.=" )

之後同古宇利島又一樣, 都係有個貝殼展館比你參觀, 然後就係手信鋪, 可以買菠蘿製成既食物同飲品, 大部份都有得試飲試食. 當中菠蘿汁一定要試, 係天然既甜, 平時飲唔到的.

回程時, 出返大門口影番張相, 紀念下點解我會黎呢度. 自己佩服自己.

名護鳳梨公園
營業時間: 09:00~18:00
網址: http://www.nagopineapplepark.com.tw/

真係想去既話, 記得上官方網站下載番張入場九折優惠券.