2016年10月9日 星期日

沖繩結婚指南


2014年2月14日, 係我同我老婆喺沖繩結婚既大日子. 呢篇文章就係以真人SHOW既方式去話比大家知, 去沖繩結婚有咩要注意, 結完婚返到香港又要做啲乜, 點樣揀旅行社好? 


去沖繩結婚做足準備



  • 先揀教堂
    • 去得沖繩結婚, 教堂當然係主角, 所以第一樣要做既就係揀教堂. 教堂除左要你老婆鍾意之外, 可以容納既人數都係一個問題, 如果你好似我咁淨係兩個人去既話, 就要揀間細少少既教堂, 咁影出黎無咁空洞. 交通方面反而唔係咩大問題, 就算你無車牌唔可以自駕都好, 辦法總比困難多! 最多咪包車去.
  • 比較婚禮公司
    • 揀完教堂就要格價. 由於香港所有既婚禮公司基本上都係 "代理" 間教堂返黎做, 所以你可以喺不同既婚禮公司度搵到同一間教堂. 呢個時候你要做既就係比較服務同價錢, 例如婚紗, 攝影, 機票, 酒店等等. (當然啦, 婚妙展時去幫襯會多啲優惠, 例如送來回機票同一晚酒店等等)
  • 合法註冊
    • 乜都揀好晒之後, 就要諗註冊既問題. 合法註冊大部份既公司都係收$3000-$5000左右. 考慮既要點就係你返香港後仲會唔會再擺酒同註冊, 如果唔會既話, 就要比錢佢幫你安排埋合法註冊. 因為你喺教堂入面簽嗰份野只係紀念品, 無法律效力的. 做埋合法註冊既人, 喺教堂既儀式完成晒之後, 當地工作人員會車你去市役所度做註冊, 需時15分鐘左右, 同香港一樣, 有職員會核對雙方既文件, 之後就會即時出番份結婚證明比你. (當然係日文架啦), 返到香港之後, 交番比旅行社, 佢會幫你翻譯做英文, 然後你只要填番入境處既ROP18表格 http://www.immd.gov.hk/pdforms/rop18.pdf, 連同日文結婚證明及英文譯本寄去入境處, 就可以更改你既身分為 "已婚", 香港呢部份係免費的, 即是你可以慳番註冊費五百幾蚊, 仲唔駛驚有人可以反對你地既婚姻.

結婚前


我地揀左位於沖繩北部, 國頭群郡既Okuma Felicia Church結婚. 上文講左啦, 交通唔駛諗架喇. 不過我都無諗到原來真係遠得咁緊要, 如果自駕既話都要兩個半鐘車程, 何妨我係搭巴士. 要去沖繩北部, 例如水族館美國村, 都係先要去名護巴士總站再轉車. 我地先由那霸機場出發. 真人SHOW START!!


那霸機場內陸航廈或國際航廈正門口就會見到一個個既巴士站. 去名護可以搭111120號巴士. 但係記住要搭111, 因為111車程係1小時50分鐘(實際用左2小時10分鐘), 而搭120既話車程係3小時, 實際即係仲要多少少!! 咁當然111會貴少少, 每位¥2130, 比120貴三四百YEN.





去到名護已經係夜晚七點幾, 太黑喇, 所以補番白天相比大家睇. 名護巴士總站好似一個大停車場咁, 呢度有公廁, 仲有個飯堂, 等車等得耐可以入去食少少野. 因為由名護去北部既巴士係極疏的. 而去國頭郡就要搭67號, 車程約50分鐘, 車費係¥980.


上圖既 "5番" (5號月台)就係回程搭返出機場的.
下圖就係國頭郡奧間海灘入口巴士站, 去教堂同酒店都係要喺呢個站落車, 一落車就有間Family Mart, 相當好, 我既晚餐有著落.

呢間仲要係全沖繩最北部既Family Mart黎添.


其實沖繩每間教堂既附近, 都一定有間相關既酒店, 因為最早既結婚時段係9點左右, 扣埋新娘化妝要三個鐘, 即係五六點就要起身. 所以一定要Book埋呢間酒店一晚, 慳唔到的. 下圖係酒店客房內部, 超靚!!! 仲有露台!



結婚中


第二朝, 天濛光就去教堂了.



教堂旁邊有座建築物, 呢座係用黎化妝同比親友等候既地方, 入面有好幾間新娘房, 足夠一天既BOOKING獨立使用, 所以用黎擺野都得. 上面講過啦, 新娘化妝要三個鐘, 所以呢個時候我去左酒店嘆早餐, 跟住再周圍影下相.








一朝早, 沙灘無乜人, 非常好, 陣間我地就會喺呢個沙灘度影相. 好喇, 戲肉到.



呢間教堂既特點係所有既野都係透明的, 包括埋座椅, 所以無親友既情況下都唔會好肉酸. 上圖呢本就係我講過話用黎紀念既教堂結婚誓約書, 無法律效力的, 你想一年黎一次都可以.

結婚後

教堂既儀式完左之後, 返番去新娘房度換番便服. 職員就車左我地去國頭郡市役所做合法註冊, 過程約15分鐘. 之後就會送埋你返酒店, 可以自由活動. 而呢個亦都係沖繩結婚既標準Run Down. 所以最少你都要住一晚教堂旁邊既酒店的, 雖然好貴, 但係都無辦法.

下圖係國頭郡既道之駅, 當係遊記咁比大家睇下啦:






祝各位新婚快樂, 有問題既隨便發問啦.

沒有留言:

張貼留言