古宇利島

有睇尋晚巨輪II既朋友, 都會見到蕭正楠同陳凱琳喺一個好靚既島上面談情, 仲一齊敲戀人鐘添. 呢個咁靚既地方, 就係有戀之島之稱既古宇利島喇.

首先, 唔係自駕遊既朋友係黎唔到的, 呢度無巴士搭. 而自駕遊既朋友, 上圖就係停車場, 大約有三十幾個車位, 我當日都要等左一陣先有位. 行過對面馬路就係今次既重頭戲Kouri Ocean Tower.

由市區出發

眼前就係古宇利大橋喇

在橋上

售票處

黎古宇利島都係得一個目的, 就係去呢座塔, 入場費係￥800, 上圖可以睇到呢度樓高四層, 除左一樓係精品店同資料館之外, 二三四樓都係觀光塔. 不過上塔之前, 有一樣好好玩既野比你同你另一半浪漫下, 就係坐無人駕駛車.

車程大約5分鐘, 沿途可以飽覽古宇利大橋既景色, 個海青藍色, 靚到不得了. 落左車之後, 就可以入去主塔範圍, 首先係貝殼館.

上圖呢種心型貝殼, 用黎送黎一流, 又平又靚.

之後可以搭LIFT上塔既二三四樓.

上圖呢個就係戀人鐘喇. 蕭正楠同陳凱琳就係喺度敲鐘架喇, 呢度無人趕你, 任你影, 不過勁大風, 會整亂晒個頭.

(以上圖片取材自無綫電視劇集巨輪II第24集)

敲完鐘, 行過對面座建築物, 就係食肆同手信鋪. 玩完買完, 就可以落番山, 經過古宇利大橋返番去市區......不過唔好咁快走住, 橋既旁邊有個免費停車場仔, 停一停影番張靚相先走啦.

(以上圖片取材自無綫電視劇集巨輪II第24集)

事實上, 呢度係無單車租的, 想踩單車就要自己帶. 另外, 古宇利島有一個好出名既心形石, 位置係塔下面個沙灘度. 不過咁熱我唔行喇, 沙灘旁邊有個爛地停車場, 要比錢的, ￥200一小時, ￥500全日.

自駕遊指南

比個地圖大家睇下, 古宇利島位於名護市既北部, 仲遠過水族館少少, 由水族館或者名護市渣車過黎大約30-40分鐘. 如果由那霸市渣車過黎既話, 行IC高速都要接近兩小時車程. Kouri Ocean Tower開朝九晚六, 呢度唔多野行, 最多影下相, 所以預一個鐘多啲就夠. 所以大家去完水族館三四點走, 再去古宇利島都還可以. 汔車導航GPS請入電話號碼: "0980561616"

(本文地圖取材自谷歌地圖)