2016年6月5日 星期日

沖繩篇 - 美國村



美國村係由幾個大型既商場所組成既一個地方,(P字係停車場咁解,全部都係免費的。沖繩玩自駕的話係非常方便的。)右手邊軍病院前巴士站係你落車既地點,一行入去,有間超大既Aeon Mall,跟住旁邊就係著名既摩天輪Carnival ParkDragon Palace以及American Depot。我地去左Aeon Mall先啦。



落左車之後,向車尾方向行然後轉右,行10分鐘左右就會到Aeon Mall。途中你會經過下面呢個地標A。



咁就代表你行岩路架喇,繼續行既話眼前就係Aeon,旁邊就係大型停車場。





從上圖呢個角度睇,Aeon同摩天輪距離好近架咋。跟住行入去,地下除左係超市之外,當然仲有大量店鋪比你行啦。






呢度有Village VanguardABC Mart仲有已經殺到黎香港既Titi-Kaka。最後當然唔少得既美食廣場同埋遊樂場。





由於筆者去既時候係2月情人節。所以呢度有好多情人節禮物賣。





有美少女戰士仲有JR,跟住竟然有失戀朱古力??可能你會問,點解去美國村都要行Aeon?出得黎寫梗係唔會點你啦,你估我唔驚比人起底咩?去呢間Aeon既原因係,呢間係免稅Aeon來的!!有追開文既讀者應該都會記得,幾星期前筆者介紹過小祿站既Aeon,但係市區既Aeon全部都唔係免稅店!因為只會係位於旅遊區既Aeon先會做免稅,所以如果大家想買藥品,化粧品之類既話,記住要黎呢間買。去小祿站買同樣既野買幾錢都好都係無得免稅的。

最後想講下既係,由於美國村已經係一個著名既旅遊區,所以你去到之後會發覺好多簡體字既熱烈歡迎語。好彩既係,呢度地方夠大,所以唔會好似香港咁比喼撞。跟住落黎去摩天輪同埋佢地基既商場Carnival Park行個圈先。

AEON行出黎,去到一個十字路口,正對面就係American Depot(陣間先講),斜對面就係Carnival ParkDragon Palace


Carnival Park





呢度樓高兩層,地下係衫同藥既鋪,仲有間100日元店,二樓係食肆,三樓係遊戲機中心同摩天輪售票處。









三樓就係遊戲機中心,不過得好少機玩,反而有下面呢樣野。





摩天輪收費,成人500日元。我就無玩喇,跟住去旁邊個Dragon Palace


Dragon Palace












大家睇完相之後,都估到呢個商場主要係遊樂既地方。地下有間家品店同埋紀念品店。二樓就係大型遊戲機中心 - JOY JUNGLEJOY JUNGLE之前AshibinaaOutlet都有提過下,呢間係一個大型遊戲機中心集團,當中美國村呢間鋪除左有得夾公仔同打下機之外,仲有上面幾部大型既足球籃球機。好玩架!而鍾意玩咭GAME既朋友可以去下面呢間鋪睇下,咩咭都有,一應俱全。



玩完又去下一站,由三座建築物組成既American Depot


American Depot











說實話,如果唔係影上面兩張巷仔既相比大家睇,你都唔會覺原來係三個建築物黎。American Depot主要係賣衫既,當然係美國風格既衫,例如Hip-Hop,滑浪沙灘裝等等。全個美國村,係得呢度最有美國既感覺,其餘剛才介紹過既商場,點睇都似遊客手信商場,香港人未必鍾意。好喇,最後帶大家去埋SEGA打下機。





行左咁耐,筆者當日就係食呢間追風拉麵,大家可以試下,唔差的。(車,日本食咩都好食架啦),而相既右手邊就係SEGA喇,SEGA唔容許影相,但係睇條BANNER就會估到,呢度有夾公仔機,SEGA平時都有既遊戲機,彈珠機等等。岩晒男朋友打住機等女朋友Shopping



交通指南




由那霸市出發的話,可以搭單軌火車去旭橋站旁邊既那霸巴士總站2829號巴士,約40分鐘車程。

由旭橋站出閘計,沿東口出,如下圖,就會見到上面個巴士總站。



巴士總站係三角形的,而我地要搭既係2829號,所以要去8號月台等車。





影埋個時間表比大家睇(152月攝),班次算幾密,一個鐘都有三班車左右。



如果你住喺國際通附近的話,可以由分站上車,而最近國際通既分站就係県庁北口。之前介紹過幾次架喇。唔明就睇多次下面個街景地圖。



40分鐘左右就到,車費約¥710,記住係軍病院前站落,車內有落車提示的,加上好多人呢個站落車,唔駛擔心唔識落車。再唔放心既話,又係寫定紙仔軍病院前就可以,日文同中文完全一樣,如下圖。





為左方便解釋,又睇多一次美國村地圖,右手邊就係軍病院前站,如果你想去AEON的話,落左車之後向車尾方向經地標A就會去到;如果你想去摩天輪嗰邊既話,落左巴士之後向車頭方向行,經地標B就會去到。相片如下:



(上圖為地標A,下圖為地標B)



如果你係自駕遊的話,地標B旁邊就係免費大型停車場,所以你係應該過左軍病院前站先左轉的。GPS就入AEON個電話號碼就可以: "0989827575"

回程既話,行番出巴士站過對面馬路,搭相反方向往,搭任何一部既寫住那霸既巴士都可以,包括2829120號巴士。

順帶一提,如果你想繼續北上,即係去名護或者殘波岬之類既景點既話,你係可以從落車站,搭120號往名護既巴士北上的。所以同樣地,如果你住名護附近或西北部沿海地方的話,都可以搭120號巴士落黎美國村的,不過120號出名兜路,由名護落黎我諗要兩個鐘左右。

下一集,繼續帶大家遊沖繩,下次去首里城同埋帶大家食和菓子。


註:本文地圖及街景地圖取材自谷歌地圖

沒有留言:

張貼留言