上次講完恒春之後，我地又再向南出發。喺未到達墾丁大街之前，呢個中途站你一定要去，因為呢度有香港無得玩既野玩，亦都有超平魚生食！呢度就係後壁湖喇！
之前幾集都同大家講過，喺墾丁最方便就係自己騎電動單車。所以本文都係以呢個方法入手教你點去。
無論你由恒出向南出發，定係由墾丁向北出發都好，中途你都會見到呢間7-11便利店。望到佢，轉入去橫街就岩架喇。（如下圖）
入左去之後，有得轉左既路口都係轉左，咁就會到達今集既目的地 － 後壁湖 了。但係要小心，呢段路係長命落斜，唔熟電單車既就慢慢騎喇。
見到上面呢座建築物，就表示你已經到左，呢度免費泊車的，搵個靚位泊低部車就入去食野喇喂！
呢度有幾檔食肆，筆者推介你一入門口右手邊果間。呢度啲野出名好食，上圖見到有碟我都唔記得左叫咩名既菜（老闆推介的，好食）。當然仲有三文魚刺身，一碟刺身（當地叫“生魚片”），都係NT$80-$100左右，即是話港幣二十幾三十蚊，你話抵唔抵？
食飽之後，喺食肆旁邊有間手信鋪。（不過好遊客價，睇下好喇）
離開左呢座建築物之後，你有兩個遊戲可以玩。一係玩半浮潛船睇珊瑚，二係參觀墾丁核電廠。今集我地兩樣都會介紹。
半浮潛船
後壁湖呢度本身係一個遊艇港，原本已經泊左好多遊艇。就係遊艇港既旁邊，你會見到上圖黃色既半浮潛船。上左船之後，你其實係坐起架船既下半部，而船底係玻璃來的，所以感覺上好似潛左落水咁。但係事實上架船係浮水的，所以唔駛擔心安全問題。船程約50分鐘，費用約每人NY$380。詳情請睇悠遊墾丁（http://www.uukt.idv.tw/_tw/member/01_detail.php?kd=642）介紹。
另外，如果你真係想潛水既話，呢度都有其他選擇，但係我唔詳細介紹喇，你可以搵番你間民宿既負責人安排活動。既安全時，有起意外都有多個人知。
墾丁核電廠
參觀核電廠係筆者每次去到後壁湖都一定會做既事。唔係我對科學有研究，而係，當你大熱天時又荒山野嶺既時候，想涼個冷氣，幫襯個見得下人既洗手間時，核電廠係一個上佳既選擇！呢度冷氣長開，有洗手間，仲有飲水機。門口有大停車場免費泊車，有時間既話仲可以睇埋套關於核災難既3D影片添（片長15分鐘）所有野都係免費的。感謝墾丁核電廠！！
(本文地圖及街景地圖取材自谷歌地圖)
相關文章
墾丁 - 旅遊簡介 及 交通指南
墾丁篇之 - 恒春鎮, 出火
墾丁篇之 - 墾丁大街
墾丁篇之 - 船帆石, 鵝鑾鼻, 風吹砂
沒有留言:
張貼留言