沖繩篇 - 美麗海水族館

每一位去過美麗海水族館既人都一定會同你講，去沖繩一定要去。因為呢度有全球第三大既水槽，單單睇上面呢張相就可以感受到呢個有四層樓高既水槽有幾咁誇張，海洋公園根本無得比。不過，每一位第一次去水族館既朋友都會有同一個煩惱，就係應該點搭車？需要預幾耐時間？附近既海洋博公園又近唔近？一日來回趕唔趕得切？

筆者準備左９０張相，為大家解答以上所有問題。首先睇下下面呢張地圖先。

從地圖中大家可以睇到一整個海洋博公園就係咁大的。而沖繩美麗海水族館只係佔成個公園既一小部份，而全個公園計，只係得海洋文化館、熱帶夢幻中心同埋呢個水族館係需要收入場費的，當中當然係水族館收費最貴，不過去得既一定唔會慳架喇，其餘既海洋文化館同埋熱帶夢幻中心就睇各位既興趣了，去埋就唔可能即日來回架喇。

好喇，我地由正門入場喇。記得拎張免費地圖（有繁簡中文、英文同韓文）因為呢度好大架！

一入到黎，最近正門既有呢間諮詢中心，中心既後面係記念品店。

水族館轉頭先去，依傢去睇海豚水上劇場睇表演先啦，都係免費架！

每日有４－５場表演，入園時記得睇定表演時間。去到隨便搵位坐就可以，筆者去既當日係星期日，不過都唔係非常多人，要搵空位唔太難。

坐定定睇表演啦各位，睇完你會發覺香港既海豚原來係唔識表演的。

最後，筆者為各位準備左一條短短既片，片中有一個吊起左既波波，越吊越高，究竟條海豚能唔能夠頂到個波呢？留番大家去現場睇。

睇完海豚，去旁邊既海龜館同海牛館。

睇左咁耐，大家有冇一個問題，就係個公園大到咁緊要，咁咪有排行？對喇，所以其實呢個公園係有穿梭巴士搭的，單程１００日元，全日任搭２００日元，不過筆者去當日竟然係無料（免費！），咁梗係要坐下。

講明先，呢部咁細既車唔會快得過你行路好多，只係舒服啲而已。地圖入面有講班次同路線的，基本上都係順時針同逆時針兩個方向既路線，其餘有特別線係去海灘同熱帶夢幻中心呢兩個一頭一尾既地方。

講左咁耐，係時候到今日既戲玉沖繩美麗海水族館喇。

沖繩美麗海水族館

當大家去到上圖呢條扶手梯時，個指示係叫你落左去之後先轉右。

睇下個海兩隻色架，幾靚。跟住轉右，水族館入口就喺你後面。

跟住麻煩各位去售票機買飛，入場費係￥１８５０。四點後入場會平少少，不過如果你不是自駕的話，無可能四點後黎到的。算罷。

好似搭地鐵咁入閘，張飛會比番你留念的。一入去第一個景點就係摸海星。

同香港最大既分別係，呢度好大方咁任你摸，地方又大，海星又多。去過香港摸海星既朋友，唔好提喇。無得比的。之後會去到珊瑚之海同埋熱帶魚之海。呢度係好多個大大小小既魚缸比大家睇魚的。睇相易明啲。

睇唔睇到上面隻蟹？呢隻叫沖繩蟹，手指咁細隻咋，仲要得一隻鉗。之後我地會去到黑潮之海，睇下呢個四層樓高既水槽有幾吸引。

係咪好大呢？呢度仲有足夠既地方比你影相，最高既一層仲有戲院式既坐位比你坐低慢慢睇魚。上圖可以見到，每層都有地方比你影相，又唔會遮住樓上樓下。不知幾細心。講左咁耐，我諗大家都肚餓架喇。不如坐低對住個黑潮之海食野？放心啦，好平的，你估香港咩？

全個海洋博公園，最值得食野既就係呢個地方，可以對住個海黎食之餘仲要唔貴，上圖係兩個午餐，每個都唔駛一百蚊港幣。呢間野係快餐店形式運作的，自己搵位。不過讀者咁聰明，識得揀時間黎食，完全唔難搵位的，當日仲要係星期日添。食飽之後，再去就係鯊魚館。 

睇完鯊魚唔好咁快走住，臨到出口會見到一部升降機，係用黎上去黑潮之海既海面的，睇埋先走吧。

呢度可以居高臨下咁望住個大水嘈，仲有塊玻璃比你從上而下咁望落去添。筆者順手對住外面個大海影左張相。張中就係海龜館了，上回講左今日唔重覆了。離場既時候，當然又會經過一間紀念品店。

出口既旁邊有一個海洋生物標本館，免費入場的，反正就喺隔離，入埋去睇下吧。

連汔水機都見到海女＠＠＂（能年令奈）。

水族館就介紹到呢度為止。如果大家黎呢度只係想參觀呢個水族館，再睇埋上面介紹過既海豚表演的話，即日來回係無問題的。但係如果你想睇埋熱帶植物園以及沖繩鄉土村的話，咁就一定要兩日一夜了。

開放時間上面有相大家可以睇到。整個海洋博公園連水族館年中無休。只係每年１２月第一個星期三及星期四因為保養關係會休館，這是必須要留意的。最後睇埋個沙灘，跟住就到交通指南。

翡翠海灘

翡翠海灘夏天既時候真係會開放比遊客游水的。而呢個海灘既水質係ＡＡ級的，鍾意遊水既朋友就要試下喇，每年４月至９月免費開放。

沙灘分為三個專區，最左手邊係休息的海濱，唔可以游水的。而正上方既係眺望的海濱，同樣唔可以游水，對開有一個好似龜背咁既小島仔，影下相幾得意既。而右手邊叫做遊戲的海濱，呢個真係可以游水喇，仲有救生員的。呢度留番比大家去親身睇下，影沙灘會比人以為我係痴漢的。

呢度可以租太陽傘、救生衣、浮板、水泡乜都有。更衣室同埋沖身既地方當然有啦，仲要係免費既添，而儲物櫃就係￥100一個，同香港既唔同，呢￥100用完唔會退番比你的。

睇交通指南之前，留番海洋博公園既官方網址比大家睇下啦。入面有齊營業時間，以及之前介紹過既各遊樂設施既介紹。（http://oki-park.jp.t.ms.hp.transer.com/kaiyohaku/）

交通指南（那霸市內出發）

由那霸市區出發，搭長途巴士，２小時２０分鐘就可以直達海洋博公園。不過呢條巴士線比較特別，那霸巴士總站竟然係無站的！要搭就要去那霸機場。

要小心既係，呢條巴士線係無編號的，名稱係やんぱる急行。不過唔駛擔心，認住上面呢個２號巴士站就岩架喇，下面比埋時間表大家。

落車站係記念公園前，唔係沖繩美麗海呀！不過呢個站好多人落車的，加上車上面有落車提示顯示屏，唔駛擔心唔識落車。另外，日本巴士出名準時，你較定鬧鐘訓醒落車都無問題。好喇，車到了，上車！

總站係運天港，車頭寫明經過海洋博公園，而又無編號既話，就一定岩架喇。上左車之後，大約一個小時左右，巴士會喺一個道邊駅停數分鐘，比大家去洗水間或者買野飲，司機會數齊人先再開車的。

跟住落黎講吓回程：

同樣係喺紀念公園前站上番車，大家可以見到，最夜既一班車係１６：２８，筆者都係搭呢班車走的，出到去那霸市七點架喇，如果大家好似筆者上面咁介紹既方式黎玩的話，１６：２８前越對係趕得切的。不過由於係尾班車，所以早少少黎排隊好啲，單層巴士滿座就閣下自理架喇。

上圖就係回程出市區既巴士站牌，有人用行李黎霸位添。而對面馬路就係今朝黎既時候落車既地方。

交通指南（名護出發）

雖然水族館位於名護，但係由名護搭巴士過黎都要成個鐘，大家可以由名護巴士總站（下圖）搭６５、６６或者７０號巴士過黎。班次都算ＯＫ既，夾埋黎講一個鐘入面都有１至３班車。唯一要小心既係，以上三條巴士線都係用順時針或逆時針方式行車的，所以要留意不同班次既上落車地點是不同的。筆者影左張相比大家參考（回程返名護時間表），下面寫清楚邊班車係Ａ方向上車邊班係Ｂ方向上車架喇。至於名護出發喇喎，總站上車兩個方向都會黎得到。

自駕遊既朋友就方便得多了，呢度有５００個免費車位任你泊，露天既多數無位，駛前少少會有個多層停車場，泊入去就岩架喇。呢個多層停車場仲方便，一行出黎就係沖繩美麗海水族館。GPS請入以下電話號碼: "0980483748"

下集帶大家去美國村，多謝繼續支持ThatsWhy's Travel。