阿里山

(轉載自舊BLOG - 18/07/2012)

喺台中同台南之間, 有一個好出名既縣, 就係嘉義縣. 而一般香港人去得嘉義縣既原因就只得一個, 就係上阿里山喇!!!

平時我會將乘車指南放起最後先寫, 不過阿里山特別啲, 唔寫清楚比你睇, 你就唔知點決定去定唔去. 如果你問我覺得阿里山值唔值得去? 我會答你, 去到你會覺得無乜特別, 但係一生人總要去一次. 原因係, 阿里山不是遊樂場, 無機動遊戲玩, 無乜特別既景點比你睇, 搭公車上去要接近三小時, 上面又大風又凍. 不過, 阿里山既特別, 就係特別在佢無野玩, 好似無野睇. 只要你睇完我呢篇介紹之後你就會明白, 一草一木皆非必然! 上山吧! 

由於阿里山鐵路於早年921大地震後仲未修復好, 所以只可以搭公車上去, 車程係 2 小時 40 分鐘. 車資為NT$221.

公車站喺正嘉義台鐡站既正門, 我相信大家已經識點搭台鐵啦. 如果需要搭高鐵既朋友請喺嘉義高鐵站落車, 然後每20分鐘有一班免費穿梭巴士來往嘉義台鐵站的, 車程約 30 分鐘.

以上左手邊去程係由嘉義去阿里山既發車時間, 記住要寫明(阿里山)的才是. 而右手邊是回程的, 同樣要留意係有寫明(阿里山) 的才是由阿里山開出的.

另外, 每日有四班來往嘉義高鐵站至阿里山的公車, 時間如下:

嘉義高鐵站開出 / 阿里山開出

10:10 / 14:40

11:40 / 16:40

由於上山既道路多年因地震或颱風等因素而令到路面好似行地盤咁, 所以上文所講既公車就係呢種小巴形既公車, 座位就一定比較窄, 加上要接近三小時車程, 真係少啲精力都唔掂.

無論上山定落山, 公車都會喺大約一半路程 (即石棹呢個地方) 停留約10分鐘, 呢度當然有洗手間, 仲有間7-11. 呢個時候就落車鬆一鬆, 去個洗手間, 之後再要搭成個鐘架!

恭喜你! 你已經排除萬難, 上到黎阿里山了, 不過要留意數點, 由於阿里山地勢高, 所以平均氣溫只有十度左右, 就算山下面你要著短袖熱到出汗都好, 記得帶定件褸上黎. 冬天更會低至零下幾度! 另外就係臨到達阿里山總站時, 乘客係要落車買入場券的, 成人為NT$200. 不過你會見到當地人幾個人買一張就算數. (因為呢度係無人查票的, 買黎自己得個睇字) 但係我要提醒香港既旅客, 由於入場券係包左旅遊保險既關係, 幾十蚊港紙就乖乖地比錢買啦.

好喇, 出發周圍去!!

生長於一個無污染既高山之上, 花草樹木都特別靚. 記得帶相機黎呀!!!

一個全木造既阿里山車站, 基本上得三條路線.

1) 祝山: 晨早睇日出既路線, 呢班車我未坐過, 要住民宿既你問下當地民宿就會知道, 時間好似係早上四點幾開出, 車你去祝山觀日平台, 回程時間係日出之後30分鐘 (我諗你落車時問定司機或職員會比較好)

2) 沼平: 一般民宿或者賓館都會喺沼平呢度, 當然民宿或賓館可能會有接駁車, 載你去阿里山甚至係奮起湖, 呢層要問番你民宿了.

3) 神木: 呢度係本文重點介紹既地方, 下面再詳細介紹.

以上三段車程大約10-15分鐘. 除了祝山外, 其他車資為NT$80 (來回). 祝山睇日出班次收費為NT$150.

好喇, 我地要上車去神木喇!!

車廂內部. 車程唔算耐, 有冇得坐都無所謂啦. 不過如果假日上黎既話就真係企都無位企.

大家睇下森林鐵路既危險之處, 又急彎, 路又窄. 去年呢個時候, 就係呢條往神木既阿里山鐵路出意外, 做成5死99人傷.

到達神木站了, 呢度無月台架, 請乘客由右手邊既樓梯離開車廂.

神木其實有咩野睇, 有咩野玩? 其實呢度係阿里山巨木群棧道, 你由呢度落車沿住步道行一個圈, 就會返番黎呢個車站. 路程大約30-60分鐘 (睇你行幾耐同埋影相影幾耐了). 有咩影? 跟我黎啦.

沿住車頭方向, 你會見到呢條樓梯, 跟住人行上去就無錯架喇, 單程路來的.

沿途你會見到好多勁高既大樹, 最後生(年青)的一棵都有幾百歲, 而最老既一棵陣間會講到, 有2300歲咁老, 要十幾個人手拖手先可以圍到棵樹一圈!!

就係呢棵了, 被稱為神木!! 佢有45米高, 12.3米粗. 樹齡係2300年, 上圖你會見到, 我要企到咁後先影到少少, 當你處身於呢棵樹下面之後, 你就會諗, 喺呢2300年入面, 難得無數戰亂, 天災都無影響到呢棵樹! 利害!!

行左一個圈之後, 就會返到黎神木車站, 咁岩有車, 就要番去阿里山了. (註: 神木站及步道內沒有任何小賣店或食肆, 請自備水及乾糧)

返到黎阿里山, 時候都唔早, 開始大霧了.

呢度有郵局, 貪得意既你可以喺度寄番封信, 咁就會有阿里山既郵印了.

呢間係全台灣最高既7-11, 每個旅客都會喺呢個牌下面影相的, 不過講全台灣最高既便利店唔係佢, 而係下面!!

阿里山萊爾富. 比7-11高多30公尺. 不過呢度無7-11咁多人影相. 鬼咩, 7-11出名D嘛. 另外提提大家, 回程既公車車票係喺呢間7-11入面買的, 由於公車座位較少關係, 請預早買定回程票.

大家如果想食野既話, 沼平或者阿里山站都有不同的地道餐廳可供選擇. 行下街買下手信的話, 阿里山站就有了. 另外要順帶一提, 其實阿里山上仲有一個叫奮起湖的地方, 呢度又係另一個民宿/飯店既集中地, 奮起湖距離阿里山約40分鐘車程. 奮起湖有南台灣九份之稱, 所以呢度除左有民宿之外, 仲有老街比你行街買野, 仲有間火車博物顯示館, 但由於時間關係, 筆者未能親身到達奮起湖, 日後有機會去的話, 再補回相片吧.