2016年6月5日 星期日

沖繩篇 - DFS / Naha Main Place

今日帶大家沖繩既新都心,呢度除左有全日本唯一一間設於機場禁區以外既Duty Free門市之外,仲有當地人好鍾意ShoppingNaha Main Place商場同埋樂市。前往既方法好簡單,搭單軌火車就可以。

落車站叫おもろまち駅,呢個站係全條沖繩單軌唯一一個無中文名既站,所以好易認。如果由國際通(県庁前駅)出發計,搭四個站就到,10分鐘都唔駛。




Duty Free


  
呢度樓高兩層,睇相已經可以見到有咩牌子既店鋪喇,當然,女士們最愛既化粧品品牌當然一應俱全啦。呢啲同香港DFS一模一樣既我就唔多講喇。講下點購物先。



大家買野既時候如果想免稅既話,係要出示你既機票同護照證明的。跟住店員會為你當你開張購物咭(其實係上圖呢張紙),並且會寫上你班機既資料。呢張咭有兩個功能,第一係你再買任何物品時,佢都會嘟番呢張咭上面個條碼黎做番免稅比你;第二係,由於呢間鋪係免稅店既關係,所以所有比左錢既產品都唔可以即刻拎走的。(咁點先可以攞?)去機場上機前先准攞囉。




張咭既背面會有見到上面呢張地圖,當你臨上機之前,拎住呢張咭就可以喺禁區入面既Duty Free分店拎番你既戰利品,具體方法如下:



首先你要如常咁去櫃枱Check In,之後入閘,經過保安檢查,再過埋海關,之後就會見到上圖既箭咀,跟住行就見到,好近的。



見到呢間Duty Free就岩架喇,行到最入就會見到個Pick Up Counter



最後筆者比大家幾個提醒:


 ) 你只需要入閘前兩小時完成購物,就已經有足夠既時間比佢運去機場,即是話你 上午去おもろまち駅既Duty Free盡情咁買,食完晏下午上機的話都趕得切拎。放心啦,你買野既時候佢已經知你坐邊班機,趕唔切佢唔會做你生意的。
  
2)於機場提取貨品既時候,所有物品都係用有封條既保鮮袋入住的。所以大家記住自備物袋,否則你會好難拎的。

 跟住我地繼續由おもろまち駅出發,去當地人都好鍾意去既商場Naha Main Place同埋佢旁邊既樂市。我地睇下地圖先:



穿過左Duty Free之後,先會見到下圖呢間TSUTAYA書局,有興趣既可以入去睇下,幾大的。再行前幾步,就會見到Naha Main Place商場。




Naha Main Place



Naha Main Place係一個好典型既日系商場,基本上同大阪阿倍野既Q's Mall一樣咁滯。地下有大型超市、電器鋪,二樓有機鋪同戲院,其餘衣服、食肆、精品店樣樣有,我地一齊入去睇下啦。









AKB彈珠機呀!好抵玩,每局¥100咋!筆者就係喺呢度打住機等我老婆行街的。講番呢個商場,除左一啲耳熟能詳既時裝店例Lowry’s Farm之外,其餘既店鋪都係賣一啲較為平價既JP時裝(筆者唔識形容,將香港人叫既MK暫時叫做JP吧),一件衫或者一條裙都係一百蚊港幣左右,所以好多當地人都黎呢個商場度行街的。行完之後,經過博物館/美術館之後,就會去到另一個建築物,就係CO-OP(蘋果商場)



CO-OP (蘋果商場)





蘋果商場地下係一家超市,二樓全是食肆,當中最特別只有呢一間玩具反斗城,因為佢係全沖繩唯一一間。大家無興趣既話,再行多幾步,就會去到RAKUICHI樂市,筆者行完呢幾個商場之後,天都黑齊了。



RAKUICHI樂市










如果要我形容樂市既話,我會話呢度其實係一個超大型停車場。而停車場既旁邊唔係油站,反而係大家上圖見到既幾間大型店鋪。當中有之前小祿AEON篇講過既UNIQLO、無印良品、OUTLET篇見過既Sports DEPO同埋有得免稅既DAISO。自駕遊既朋友,今集所講既幾個商場都有免費停車位的,請盡請享用。自遊行既朋友,搭單軌落車之後,原路行亦要原路走。


自駕遊指南

呢度我推介大家泊Naha Main Place既多層停車場, 唔駛錢任泊仲一定有位之餘又唔駛曬住部車,  喺GPS入呢個電話號碼就可以去到:  "0989513300"



下集開始,我地又會番返去國際通,行街買手信之餘,仲要帶大家食石坦牛同黑蒜麵。多謝支持!


(本文地圖取材自谷歌地圖)

沒有留言:

張貼留言