沖繩篇 - 串角 (串燒放題)

今日帶大家去一間當地好出名既餐廳食串燒放題. 呢間餐廳叫 "串角", 喺沖繩有九間分店, 其實佢除左串燒之外, 仲有得飲啤酒同食壽司等日本食物. 不過一心去到, 當然串燒係主角, 加上仲可以揀放題定散叫逐串比錢添, 就更加會揀放題. (不過下次再去, 我就會揀逐串比錢喇) 睇左下面啲相先再講啦.

今次介紹呢間鋪位於旭橋站附近, 旭橋站旁邊就係那霸巴士總站. 所以大家由美國村等等地方搭長途巴士返到出黎, 食野串角先返酒店係好順路的!! 而營業時間係傍晚17:30至第二朝05:00!!

痩せません

店內既環境係咁的, 我個位仲有電視睇添. 好喇, 入正題, 睇餐牌.

上面呢個餐牌就係逐串叫既用的. 不過由於我係食放題, 咁當然選擇會少D啦. 另外, 點解9間分店我會介紹大家黎呢間? 因為係得呢間有中文餐牌, 呵.

店主好有心機咁手寫既食物既中文解釋比大家睇架喇. 不過落單就一定要寫日文, 好似上圖左手邊咁, 寫番你個枱號, 食物同埋要幾多串就可以. 好喇, 上菜喇好嗎?

呢度賣點係全炭火燒, 如果你問我呢. 可能我食慣香港串皇嗰D醃到好濃味既串燒, 所以覺得呢間比較淡味, 但係就換黎原汁原味既肉味同炭火味, 睇你個人喜歡喇.

食完既竹串記得放番入呢個筒度. 好喇, 講左咁耐, 究竟放題係幾錢位呢? 答案係￥2500一個人, 限時120分鐘, 任食同任飲, 飲品方面可以揀綠茶, 汔水或者啤酒都得! 比埋佢個官網大家睇, 入面有齊價錢架喇. <<串角官方網站>>

最後提一次大家, 除非你真係好叻日文, 否則唔好自己賴醒走去第二間分店食. 因為部份分店係唔招乎遊客的, 就好似下面赤嶺站附近嗰間, 我去左兩日佢都話FULL, 但係明明大把位. 我相信係鋪頭唔想逐樣解釋啲食物係乜野掛. 所以要去就去旭橋呢間啦.

(本文地圖取材自谷歌地圖)