上文單軌電車線編教左大家點樣搭車去國際通, 即係去県庁前駅落車. 出左閘之後轉右, 就會見到下面呢個大商場 - RYU BO.
而筆者身處既地方就係國際通既入口, 即係下面呢張相. 真係寫明國際通入口架!
沖繩既那霸市真係無乜野好行, 最出名既只有國際通. 無論自由行定跟團都會黎國際通行, 就好似去香港要行廟街一樣. 上次都講過, 搭單軌由機場去國際通只要17分鐘, 所以Check in完再出番黎行一陣甚至係食下野先返機場都係可行既做法. 國際通呢度有好多食肆同商店, 商店除左衣服之外仲有好多動漫既物品, 反而名牌/大牌子既店鋪就一間都無. 呢度既餐廳多數都提供中文菜單, 岩晒遊客. 下面呢張地圖, 放大左都仲係太細了, 參考下算啦, 國際通一條大街唔會迷路的.
玩完沿路返番去單軌站就可以. 而國際通全長1.6公里, 如果要行完一邊再調頭行另一邊既話, 我諗都要行半日. 以下既相片, 我已經係分開咁由朝行到晚, 不過都仲未行得晒.
沖繩出名黑糖, 黑糖雪糕當然要試.
依傢香港都有既圈圈蛋糕, 呢度仲可以睇住佢即製添!
呢度白天定夜晚都一樣咁熱鬧, 店鋪一般收夜晚九點至十點半都有, 而食肆由於附近比較多酒店既關係, 部份收零晨一兩點添.
--------------------------------------------------------------------------------
2015年既更新, 有新既地圖, 當然, 仲有新既鋪啦. 又睇下地圖先.
地圖上面既食肆，包括琉家黑蒜麵、牧志公設市場同Steak 88扒房都已經介紹過喇，大家追番2015年既沖繩篇就可以睇得番晒。其實除左國際通之外，有三條橫街都幾多野行架，就係地圖既三條紫色線，包括通去牧志公設市場既市場本通り，佢旁邊既むつみ通り街，最後係好多特色野買，包括玻璃同有間塩屋總店既平和通り商店街。
呢個塩雪糕好出名架，買完軟雪糕之後，門口有幾種唔同味道既塩粉比你落。當中朱古力味同綠茶味都係筆者推介的。大家幻想下，朱古力味既塩會係點既呢？去試下啦。
上面呢條路係通去牧志公設市場大家應該記得架啦，而旁邊就係去日本潮聖必到既２４小時營業既激安之殿堂，呢度樓高四層，地庫係超級市場，藥品同日用品。記住，全部都可以做免稅架！！
繼續行下街，全個國際通都有賣手信既手信店。
喺麥當勞對面有呢間卡樂Ｂ專門店，不過好似無薯片賣架喎，同卡樂Ｂ有關既紀念品就好多。跟住再過少少既對面，有動漫迷最鍾意既JUMP STATION。
除左JUMP STATION之外，呢度仲有間唔講都搵唔到既Animate。位置係上次介紹既Steak 88扒房正對面既四樓，樓下同外牆完全無招牌，所以筆者去過幾次沖繩都搵唔到，最後要上網睇地址。
地下暫時係一間叫做未來郵便既店鋪，鋪外有部升降機，上到四樓一開門就係架喇。不過入面唔可以影相所以門口影張相就算。
自駕遊指南
國際通入面有多個收費停車場, 價錢都開放時間都不同, 想知最抵泊既停車場, 請去下面沖繩自駕遊篇睇.>>http://thatswhystravel.blogspot.hk/2016/09/blog-post_28.html
(本文地圖取材自谷歌地圖)
沒有留言:
張貼留言