那霸空港 (15年2月更新)

終於開始沖繩篇, 一開始無乜野好寫, 都係介紹左個機場先啦. 特別係介紹2014年2月17日先啟用既新國際線航廈, 絕對快過旅遊書. 睇下地圖先.

由於那霸新國際航廈係今年先開既關係, GOOGLE MAP都未更新的. 地圖靠右既地方係那霸市既唯一一條鐵路 - 單軌火車既總站, 不過總站只係有兩條天橋連接去內陸線既ANA同JAL航廈. 要去國際航廈返香港既話, 就要經ANA既內陸線航廈, 落番地面, 沿住馬路慢慢行過去, 仲要係露天既添. 你睇下日本人幾唔歡迎遊客, 無論以前既羽田機場同那霸機場, 都係服務本土市民為先. 連單軌鐵路都唔延長少少去埋國際航廈, 真係激死人. =.="

行左幾分鐘, 終於行到過黎國際航廈, 其實唔係好大, 甚至應該話好細. 地面係接機大堂, 二樓係Check-in Counter及出境海關同埋一間餐廳及極少量店鋪, 三樓係食肆.

上圖就係Check in既地方,  真係得眼見咁大, 分左右為AB兩邊, 每邊負責不同的航空公司. 但係由於呢度既Counter全部都係Share黎用既關係. 所以大家唔好諗住一早黎check in左先, 一般航空公司都只會係起飛前兩個小時開放check in counter, 特別係港龍, 因為佢每日得一班機, 香港航空都好D, 有早機, 都叫有得搏下. 無得check in咁唯有搵locker放行李啦, 點知呢個航廈既Locker少到......

全個國際航廈, 得呢16個Locker, 位置就係起正話check in counter既旁邊. 以筆者咁計, 我已經要霸兩個特大Locker黎放兩個大喼, 咁你話16個邊夠用. 所以大家可以考慮將行李放番去內陸線航廈, 果邊有過百個Locker.

以上係食肆同店鋪.

一如所有日本既機場, 想行街睇下飛機等等, 都係去番內陸線航廈好D, 依傢我地過番去內陸線航廈先.

上圖就係內陸航廈Check in Counter既地方, 當然大好多啦, 因為班次都密好多. 眼前望過去既就係JAL, 而筆者身處之處就係ANA. 而下圖就係餐廳既指南, 呢度有成十幾間餐廳, 由Burger到Pizza同西式日式餐廳都有, 仲有得行街添.....

正話三樓就係Check in既地方, 而入閘就要落番去二樓的, 另外二樓仲係商鋪既樓層, 仲有個超大大堂, 可以比你睇飛機, 影下相同埋貼紙相.

仲有時間剩既話, 仲可以比￥100去瞭望台度睇飛機添.

機場範圍內好多地方都有下面呢種賣布袋既機, 細既￥500, 大既￥1000不過大既有轆.

另外, 二樓仲係通往Monorail 單軌火車既地方, 下一篇文章會為大家詳細介紹Monorail 架喇.

最後用文字介紹下地面層 (即係日本叫一樓啦), 呢層係接機大堂, 有幾間便利店以為租車公司. 另外, 仲有一個遊客服務中心解答遊客交通上既問題, 最利害既係佢地識講國語架! 另外, 呢間遊客服務中心仲有一個好重要既作用, 就係 "唱散紙", 平時大家去旅行, 在香港既找換店會唱好多大紙幣, 例如一萬YEN, 咁點買飛搭Monorail 或者上巴士呢? 答案就係呢度, 你可以免費搵佢唱散紙, 我搵佢唱左兩三萬YEN佢都無問題. 識得用其實好好用, 黎到那霸機場就記住喇. (位置在地面層整個長方形大堂既正中間, 去到就一定會望到)

另外, 喺呢個遊客中心既旁邊, 有間當地旅行社, 呢度有沖繩景點既平飛賣, 就好似美ら海水族館既入場券咁, 呢度賣會平幾百日元的. 有興趣既朋友可以去睇下.

---------------------------------------------------------------

2015年2月更新:

今次呢個更新主要係講兩樣野, 第一係去完DUTY FREE買野之後, 佢係會自動送貨去機場的, 咁究竟之後要點攞呢? 第二係, 14年開始, 除左電子產品之外, 就連藥同食物都可以免稅, 不過要求係, 你離開日本前都唔可以使用同拆袋. 咁如果係藥水同飲品, 明明係液體一定要寄艙, 咁又點算呢?

當你去完DUTY FREE買野之後, 佢會比一份上面既小册子連收據比你. 只要你喺2小時後去到機場, 就可以提取你買既野. 不過首先要做既係要過左海關先. 所以呢度你要預左要手提拎上機, 無得寄艙的, 就算係香水都唔怕. 如果睇地圖唔明既話, 唔好煩喇, 直接過左海關先啦.

過左海關之後, 右手邊你會見到上面個大招牌, 就會去到Duty Free Shop. 而間shop最入面, 你會見到上圖呢個Pick-Up Counter. 你只要拎張單比職員, 佢就會將你買既野, PACK好晒咁比你. 你直接拎上機就可以了. 下面係附近既店鋪, 順手影比大家睇下.

到第二樣野喇, 當你買完免稅既消費品之後(即係食物, 藥, 酒之類) 店員會為你PACK入一個密實袋度, 個袋口係雙面膠紙黐實的, 確保你唔會離開日本前拆開食用, 並且會喺你本護照度釘住張免稅既單據, 等海關人員可以知道. 不過咁, 筆者已經測試過, 莫講話, 過海關前既保安檢查唔會理你有冇帶免稅品(因為佢唔會睇你本護照, 所以根本唔會知你有冇免稅品), 就連過海關時, 佢見到張免稅單據都唔拎走佢就咁放我走. (上次筆者去大阪時, 關員係會拎番走張單的, 不過同樣唔會檢查我既行李). 原因好簡單, 過海關已經多人, 佢仲要逐個人叫你拎行李比佢對實在太煩. 另外, 由於海關無收費既功能, 所以如果真係要收番你稅錢, 佢都無辦法即場收的. 所以.......大家買完之後, 放心放晒落喼度寄艙吧啦.

本文地圖取材自谷歌地圖