2016年5月31日 星期二

Mishima Skywalk 三島吊橋




今日介紹既呢個地方,落成唔夠一年,所以好多雜誌都介紹過架喇,就係可以影到富士山三島吊橋Mishima Skywalk。不過咁,本本雜誌都淨係影幾張相,再貼個地址出黎就當介紹左,三島喎?唔係JR東日本既範圍黎架喎,大家真係識去?今日筆者會教大家幾種前往三島吊橋既方法,包你睇完一定明。
我地由三島吊橋巴士站落車之後開始講起:






我最鍾意上面呢張相,箭咀指住既就係售票處,大家去到先買飛都未遲的。







入場費如上圖,每人一千日元。好喇,入去行喇。




話明係吊橋,所以條橋係會被風吹郁的。怕高怕暈既朋友只要一路望住最前,有咁遠望咁遠就無咁搖架喇。全條橋長400米,其實好快就行完,不過多數人中途會停低影下相。留意左上角,有一個白色既三角形,嗰度就係富士山喇。












話咁快就行到對面。呢度有一檔賣栗子的。




跟住繼續行上山。















呢度有個賣許願種子既紀念品車仔檔。每片賣二百日元。佢寫明你可以在吊橋上掉種子的,又係咁啦,掉既時候許個願吧。
呢邊係得咁大,所以要行返轉頭,出番去巴士站。呢度有個Sky Garden







沿扶手梯上去,就會見到呢座玻璃屋。














其實呢度係一間手信鋪,亦有少量小食例如雪糕比大家品嘗下。從扶手梯上望向巴士站是這樣的:

巴士站旁邊有雪糕店,有三島吊橋模型展覽,當然唔少得有個大型洗手間,幾十人一齊用都無問題。



介紹完條橋,講番點樣由東京去吊橋。先由最直接既方法講起,當然亦係最貴既方法啦,就係搭新幹線。



東海道新幹線






東京出發,搭JR東海道新幹線,只需約45分鐘就可以直達JR三島站。再由JR三島站既南口搭半個鐘巴士,就可以去到三島吊橋架喇。JR東海道新幹線單程收費4000,來回成五百蚊港紙架喇,所以搭得新幹線就梗係要買PASS啦,不過由於三島站不是JR東日本既範圍,所以買JR東日本既PASS係去唔到三島的。一定要買全國JAPAN RAIL PASS,最平既7天全日本JR任搭,票價29110,記住要喺香港既旅行社預早買定架!




上圖呢度就係三島站既南口喇。旁邊有個東海巴士既售票櫃位如下圖:

大家去上圖左手邊嗰間東海巴士買飛就可以架喇。買飛之前提醒大家一件好重要既事,就係新幹線落車時唔好出錯閘!!

大家睇到了吧,出錯左去北口既話,要行成10分鐘先可以返到去南口的,否則的話,就要買入場券(即係台灣鐵路既月台票)。不過咁,大家有JR PASS架嘛,駛乜驚?扮搭車行返入去咪得囉。下圖係北口個樣,認住佢唔好去錯呀!!



好喇,講番東海巴士,由南口去三島吊橋車程約半小時。平日班次為每小時一班車,星期六日及假期部份時間一小時有兩班車,大家去5號月台等車就岩架喇如下圖:



回程班次如下:

提提大家,東海巴士係有來回優惠票的,每位900,就連當地人都買架。

巴士內有顥示,寫明去到三吊大吊橋站落就一定岩架喇。




熟路既朋友可以從面既相片已經睇到,呢部巴士既另一端總站係元箱根港(即係箱根)所以如果你想行完三島吊橋之後再去箱根入住,又或者調番轉,箱根住完過黎三島之後先再出番東京都係可以的。由三島大橋往元箱根港車程都係半小時左右。元箱根港可以轉特急巴士出箱根,車程約半小時。(關於箱根既行程請睇番我既箱根篇



JR東海道線

第二個來往三島同東京既方法就係坐JR東海道線,同上面個方法唔同既地方,就係上面教大家坐JR東海道新幹線,而呢條係普通列車叫JR東海道線(即係平時大家來回東京同橫濱嗰條)。話明係普通列車,時間當然會耐啲,車程約2小時11分。中途仲要喺熱海站轉車,不過就平一半咁滯,車費係2270

提提大家,由於熱海站JR東日本以及JR東海既分隔線,所以大家由東京出發搭JR東海道線去到熱海之後,係要落車再轉另一班JR東海道線繼續行程去三島的。情況就好似你搭西鐵綫去到紅磡站,要轉車先可以去到沙田一樣。所以你唔好覺得奇怪,點解明明都係叫JR東海道線但係要轉車。亦都因為過左熱海之後就係另一間公司服務既原因,所以如果你係用西瓜咭Suica Card的話,必須在東京站預前增好值,否則去到三島站之後,所有既增值機都不支援西瓜咭的。呢點務必留意!

沒有留言:

張貼留言