海女篇 - 小袖海岸

今日黎到日劇“海女”既重要場口，就係小袖海岸喇。每年七月至九月，一班海女就會喺呢度表演潛水捉海膽比大家睇，入場費係五百日元。不過唔止有得睇，比多五百日元，仲可以即食即開既海膽，係咪好吸引呢？一齊黎睇下啦。

一落車，就會見到呢塊石埤，上面寫住“Je, Je, Je”。咩黎？係久慈既鄉下話，意思係驚訝咁解，如果再驚訝啲既話就會再加多一個Je，如果再再驚訝啲既話就再加一個Je。有睇日劇既朋友一定知架喇。無睇過既朋友你依傢係咪好Je Je Je Je Je？

終於黎到小袖海女既辦事處，二樓係Café。地下呢層係售票處同埋售埋紀念品的。當然，唔少得有海女裝扮既女子同遊客合照同傾計。

首先要適應水溫，然後用海帶黎洗潛水鏡，原來用海帶黎擦下鏡就唔會有霧！

上水，一袋滿滿既海膽，遊客就開心喇，因為可以開餐。

即開，洗下佢，再挑走條腸，咁就食得。

唔好講笑，當你食緊佢既時候，佢啲針仲識郁架！所以唔好咁大力拎住佢，放輕隻手浮住佢就唔會吉親。新鮮既海膽係好綿的，好似食緊蛋黃咁，又好似大閘蟹既羔，鮮甜好食，同香港大家食到既味差好遠，香港既海膽有陣怪味，又臭臭地咁，新鮮既係完全無呢回事。鍾意食海膽既朋友，一定要黎試下！

呢度仲有“雜錦煮”食，唔好問喇，有冇睇過日劇都試左先講啦。

如果就咁影下相就當寫左一篇文章，我係讀者都唔收貨啦，所以我拍左片比大家睇。

下一集，繼續海女行程既另一個景點，久慈琥珀博物館。