上文講到，久慈其中一樣最出名既就係海膽，所以今日當然唔少得帶大家去食海膽飯啦！除左海膽飯之外，今日會介紹三間餐廳比大家，等你去到既時候可以參考下。依傢見下地圖先：
由久慈站出發計，去最近既Key Coffee食個Tea先啦。
Key Coffee
由火車站旁一直行落去，兩三分鐘就黎到，點解要介紹佢？因為日劇“海女”入面女主角婆婆既餐廳“黎明日”就係參照呢間 Key Coffee 黎設計架喇，唔信？入去睇下啦。
入面有齊各演員同導演既合照同簽名。身為海女迷係真係好值得去的。飲杯野之後，又去下一站，就係土風館喇。
土風館
喺沖繩篇既時候已經解釋過，日本好多公路旁邊都會有個叫道之駅既地方，係用黎比長途車既司機休息既地方，久而久知，呢啲道之駅變成左買手信既好地方。而土風館就係久慈市內既道之駅喇。所以好多野睇，好多野買。
黎得久慈，買琥珀係唔少得的。大家認唔認得圖中個伯伯呢？無錯喇，就係劇入面既勉伯喇。
劇中真‧黎明日個牌，竟然無掉到，放左喺呢度比大家留念。其實呢度有幾間餐廳，大家可以一試的，不過去得旅行梗係要試最地道既，所以我行左去土風館既對面，係一條叫做“歷通路廣場”既小食街搵食。
串和牛好正架！￥250平喇掛？
而就喺呢度，我搵到間主打食海膽飯既店鋪，上面呢個餐，都只係一千日元。即係七十幾八十蚊港紙，大家可以睇到啲海膽係幾咁新鮮，唔係香港食到嗰啲一塊塊雪到硬晒咁既。我喺香港係唔食海膽的，但係黎到呢度試過之後，更加唔會返香港食，因為係兩種味黎，下集再同大家詳細介紹。
田村牧場直營燒肉店
最後帶大家黎到呢間田村牧場直營既燒肉店。田村牧場係乜我就唔知喇，應該係當地既一個小牧場，但係呢間燒肉店一定要介紹，由於食材係直營既關係，所以價錢好平，肉質又好肥味。夜晚好多當地人渣車黎食架。
一如日本既燒肉店，就算兩個人去食都會有間房仔比你，私隱度極高。而上面呢碟七色牛肉，好似係三百蚊港幣左右，我同太太再加單叫多一兩碟淨牛肉，賣單都唔駛五百。超抵！！不過前往呢間燒肉店既路程就遠啲。從地圖大家可以睇到，由久慈出發，要先去到久慈市文化會館，再沿天橋方向行過去，都要成20分鐘架！
本文既最後，送番久慈市內其他景點，包括剛才提及過既久慈市文化會館相片比大家，下一集，我地會去小袖海岸，睇海女即場潛水捉海膽。
（本文地圖取材自谷歌地圖）
沒有留言:
張貼留言