日本上網卡介紹 (16年8月10日更新)

好多人都知道，今時今日買上網卡去旅行係又方便又平過租WIFI蛋架啦。但係邊張卡抵用，邊張卡有咩限制你又知唔知？

筆者見到好多網友喺團購網度中左伏，所以專登開個POST等大家知道下，究竟去日本買咩卡最好。

Docomo 4G LTE 7日無限上網數據卡

近日，團購網係咁推上圖嗰款Docomo 4G既無限上網卡，聲稱七天內可以任用無限數據。就咁睇大字報就梗係吸引啦！結果好多網友都落左搭，但係大家只要留心睇下細則既細字仔既話，就會見到佢寫明“每日首100MB享4G LTE，其後限速3G 128kbps無限上網”。嘩！每日實際上得100MB用，放張相上Facebook，睇下Youtube就爆，之後得番128kbps。仲有一件好重要既事要話比大家知既係，日本既4G制式同香港係唔同的！！香港既4G除左數碼通係用1800MHz之外，其餘主力都係2600MHz，但係日本Docomo既4G係用1800MHz同2100MHz的。而當中既1800MHz只限東京、名古屋同大阪市區使用。咁即時話就算你買左呢張卡都好，過到日本都未必成日收到4G！咁大家明白點解佢要團購散貨啦！

日本富士卡

今日筆者介紹一張我平時用張既上網卡比大家，就係上圖既日本富士卡。呢張卡好簡單，七日有效期，總用量係1.8GB，3G無限速，亦無任何網絡限制，使用日本Softbank網絡。一個正常既香港人一個月大約用1-2GB，所以呢張卡有1.8GB比你用七日係非常夠用。而最重要既係，呢張卡係無任何使用限制的，你可以將佢放入WiFi蛋同人Share用又得，睇myTV、上Youtube、開Facebook甚至用Whatsapps講電話都無問題。另外，當你開通左張卡之後，每日你都會收到ＳＭＳ提示你之前一日用左幾多用量，同埋剩番幾多用量的，唔駛驚會用爆，非常細心。

最後最重要既梗係價錢啦，呢種卡喺深水埗既街鋪有得賣，大約HK$150一張。另外Yahoo拍賣我見過有人賣HK$110。大家可以比下價。但係某團購網團購價都要HK$148。咁就真係睇下你個人喜好喇。

想知多啲遊日既小貼士的話，多啲留意ThatsWhy's Travel 啦 ！

---------------------------------------------------------------------------

2015年8月8日更新

之前為大家介紹既富士卡, 竟然出左新版. 新版仲要係不限流量, 七日無限上網!! 照舊無任何限速及限制, 可以WIFI SHARE, 可以放入蛋. 依傢Yahoo拍賣仲要賣緊$105包郵, 今年內出發去日本既朋友, 快D去買番張啦.

============================================

（2016年4月9日更新）

由於有讀者反映之前筆者介紹過既“富士咭”已經不再有售。所以今日介紹過另一張上網咭比大家。

而最諷刺既係，今日介紹既呢一張上網咭偏偏係上年我叫大家唔好買既Docomo 7日上網咭係同一間公司出的，唯一唔同既地方就係由七日任用改左做八日上限2GB用量。

Docomo 4G LTE 8日2GB用量上網數據卡

上年年尾，呢間公司推出左新既八日咭，雖然今次不再係無限任用。但係八日內有2GB用量兼 4G LTE既速度比你用。2GB對好多香港人黎講已經非常夠用，一般香港人都係用2-3GB左右一個月，依傢有2GB用量就算你搭新幹線睇myTV都絕對無問題。當然啦，如果你部手機唔支援4G又或者你去既地方無4G幅蓋的話，就會轉用3G無限速既網絡。我今年三月頭拎住部Sharp日系手機去東京、名古屋、京都甚至係金沢都一樣有4G用。就算喺新幹線上面睇片都無窒。值得介紹的！

提提大家，一如平時既Docomo咭一樣，國產手機例如小米等係用唔到的，我親身帶左一部最新既小米NOTE過去，無論我點樣手動揀網絡同手動設定APN，都係無辦法令佢有信號。另外，有台灣用家話連HTC都一樣唔支援。大家出發時最好留意下自己部手機，又或者帶定多一部舊款機過去做share喇。

最後講講價錢，旺角格仔鋪賣$98一張，Yahoo!拍賣我買過最平$65都有交易。建議大家多多格價。

(2016年8月10日更新)

今日又去左Yahoo!拍賣, 買番張準備九月沖繩之旅用. 原來呢張8日2GB既Docomo咭出左升級版, 新版係首2GB 4G LTE速度, 其後竟然送埋3G無限任用!! 真係抵上加抵. 

順手提一提, 之前有網友話HKTV MALL有多種Docomo咭賣, 當中有啲係8日3GB甚至係4GB的, 不過千萬不要買, 因為呢啲都係有每日上限的. 記住一定係8日2GB用量既先係暫時最好的.

唔明再問啦.