江之島

今日帶大家去江之島，江之島係一個距離東京一小時車程既一個島。如果用香港地方黎形容既話我會用大嶼山黎形容，因為同樣係舊舊地，又有廟又有大佛。台灣既朋友多數會用十分（台灣新北市既一個地方）黎形容江之島，因為同樣係坐小火車穿梭古舊既村落。其實筆者好多年前已經去過江之島，不過近年呢個地方連旅遊書都唔再介紹，加上早前旅行又無影太多相，所以一直都無為大家介紹，一直到去年杜如風小姐既電視節目介紹之後，突然多左網友問。於是我就再次踏足呢個地方。

表面上，江之島只係地圖左下方既一個小島，島上面有一個重要景點江島神社。事實上，由地圖左上方既藤澤開始一直到右手邊既鎌倉，都係今次既行程。要遊覽江之島既話，要花一整天時間，大約係九至十時黎到，玩到五六點走就岩岩好。而遊覽既次序，一般都係由左至右咁玩落去，而呢個亦都係今日所介紹既行程。

片瀨江之島站

從新宿出發，坐小田急既浪漫特快，約65分鐘就可以黎到片瀨江之島站。

同個站影完相之後，行過天橋然後會見到江之島旅客中心，旁邊有條隧道，行落去一直行，又會見到一條跨海大橋，跟住就會到達第一個景點，江島神社。

江島神社

過左大橋之後，會見到下面呢條老街。

沿途都幾多手信買，其中一間賣水晶的唔錯架，多款又平。之後行多幾步，終於到江島神社既正門。

要參觀神社就要上山，唔想行樓梯既話，左手邊有個售票處，賣乜？賣登山電梯！

沿住電梯上山，會經過邊津宮、中津宮等等，大家可以影下相，求下籤，寫下繪馬。之後就會去到最後一條電梯，就會上到山頂。

上到黎山頂第一樣會見到既就係上圖既瞭望塔（我唔比錢上去喇，影張相大家睇下算啦），而旁邊有間好出名小食店，賣江之島既特產既八爪魚餅。

好好食架，好似食緊蝦餅咁架。之後繼續行， 向奧津宮／龍戀之鐘同岩屋方向行。

當你行到黎上圖呢個地方之後，記得影張相記低佢。繼續直行既話就可以去到奧津宮／龍戀之鐘同岩屋，之後係要行回頭路，黎番呢個地方，沿右手邊＂下道＂既巷仔落番山的。

睇上面呢個指示牌會容易啲明，由於颱風天雨關係，今次我無去到岩屋，不過都有冒雨去龍戀之鐘。大家繼續行啦。

鎖係要自備的。行完江島神社，沿路經過正話既跨海天橋，行番去江之島站。（係江之島站，不是片瀨江之島站呀！）

江之島站

黎到江之島站，當然要搭下江之島電鐵（簡稱＂江之電＂）。呢條鐵路有100年曆史，所以每抽車都係唔同年代既產物，上圖藍色既呢抽車幾有歐陸風味。班次方面，一小時有五班車，算唔錯喇。我地登上往鎌倉既火車，去下一個站長谷，睇下長谷大佛。

長谷大佛

離開長谷站，沿指示牌經過大佛之街行7分鐘左右，就會去到下圖既高德院，院內有拍戲成日都見到既長谷大佛。

入院係要比錢的，所以我又唔入去喇，影張相就算。之後沿路出番去長谷站，最下一個站，鎌倉總站。

鎌倉

鎌倉既景點係鶴岡八幡宮，不過，前往鶴岡八幡宮既小町通其實都係一條好好行既老街。如果大家有睇日劇既話，古書堂事件手帖既拍攝地點，就係鎌倉呢度喇，真係好古老架。我地周圍行下之前，教大家點出閘先。

上圖大家可以睇到，如果我地要去東口既話，係要穿過JR線大堂的，所以大家會見到上圖呢部轉車用入閘機，大家一定一定要按中間橙色燈既制（寫住東口經過嗰句），之後先好放張飛入去，否則會當你轉車食左你張車飛的。（車飛係一日任搭架，食左陣間點返去藤澤？）

穿過JR站之後，就會黎到上圖呢個出口，呢度可以隨意放張飛落去出閘喇。出左閘之後依指示牌左轉就會去到小町通。

以下相片就係沿住呢條小町通影的，都係嗰句喇，有追睇呢個BLOG既朋友都知筆者去既時候係打緊風，所以我無去到八幡宮，喺呢度影下相行下就回程了。

最後為大家介紹埋上圖呢個蜜瓜包，亦即係杜如風介紹過既日式菠蘿包，好食的！！食完就要回程喇，搭番江之電，去呢條路線既另一邊總站，藤澤，行一陣商場，就可以轉小田急既浪漫特快，返去新宿喇。

藤澤

喺轉小田急線返新宿之前，當然要行下藤澤啦，呢度已經係城市黎，所以無古老野睇，取而代之既當然係商場，呢度有小田急百貨，有賣流行野既OPA，亦都有BIC CAMERA。

喺講交通指南之前，比條片大家睇下，以下係喺江之島上面拍攝既短片，等大家感受下電車穿梭橫街小巷既感覺，連汔車見到電車都要讓路。

交通指南

由東京市區黎江之島有兩個方案，一個係搭小田急電鐵，一個係JR。各有好處，以下有解說。

１）小田急電鐵　（http://www.odakyu.jp/tc/destination/enoshima_kamakura/）

好處係方便，小田急電鐵既市區總站係新宿，加上小田急有連同江之島電鐵既一日任搭PASS，搭小田急由新宿來回藤澤一次加江之電任搭都只係￥1470，加多￥1420就可以乘坐＂浪漫特快＂特急班次，有得劃位之餘又舒服又快。由新宿去片瀨江之島只需65分鐘。

搭乘浪漫特快既時候，一定要依照車票上所指示既車卡上車，因為日本既鐵路好興中途甩卡，各去各總站的，唔好諗住上左車先慢慢行番去你嗰卡車，好似上圖咁，你就通唔到去另一卡架喇。

另外要提提大家，要買PASS係要去新宿小田急百貨入面既旅客服務中心先買到的。其餘新宿見到既小田急客戶中心係無旅客用既PASS買的。（詳情可以睇番箱根篇，筆者曾經介紹過，唔重覆了）

２）JR East

其實江之島既兩邊總站，藤澤同埋鎌倉都有JR湘南新宿線經過的，主要目的地都係大船／橫濱／大崎／新宿等，你仲可以喺橫濱落車夜遊摩天輪，或者轉JR東海道線去品川／東京方面既車站；而由藤澤去新宿約50分鐘。其實係比小田急仲要快。不過由於無一日任搭PASS既關係，所以呢個方案只適合一早已經有JR East Pass（包括JR關東PASS或者全日本JR RAIL PASS）既旅客。咁你就唔會浪費左張PASS了。

(本文江之島地圖取材自小田急電鐵網頁)