吉祥寺

今日唔需要搭新幹線, 又唔駛趕頭趕命. 筆者帶大家去一個可以比你悠悠閒閒咁過一個下午既地方, 就係東京市內既吉祥寺喇.

無論你係由東京定新宿出發都好, 都係搭JR中央線(快速), 只需11分鐘就黎到吉祥寺.

吉祥寺就好似去左赤柱咁, 離開左市區無咁多人, 但係又好似好多野行, 總之就舒舒服服咁行下睇下野飲個TEA. 唯一既分別就係吉祥寺無海, 不過取而代之既係一個好有名既公園, 就係井之頭恩賜公園.

從上面呢個地圖可以見到, JR吉祥寺站既南口, 就係前往井之頭恩賜公園的. 而行街既地方就集中喺北口既附近. 我地由南口出閘睇下野先:

南口一出就已經有條食街, 好多餐廳的, 不過小心條路好窄仲有巴士行. 行前少少就會見到激安之殿堂同0101商場, 而上圖呢條街就係通去井之頭恩賜公園的, 呢條街就喺激安之殿堂旁邊. (公園就唔行喇,我地沿住火車橋底轉番入去北口方向). 一黎會見到UNIQLO.

樓高七層既UNIQLO好好行, 乜衫都有. 再行前少少向右手邊望過去, 就會見到下圖既吉祥寺商店街 (西入口).

呢條商店街好多野行, 除左衫褲鞋襪同日用品之外, 呢度既小食店都係非常出名的, 大家睇下上面呢間Satou Steak House排晒長龍, 就係為左食炸松坂牛肉球, 每人限買10粒架咋!

吉祥寺商店街既北部, 有呢個Coppice商場, 我會形容呢個係親子商場, 因為佢入面多數賣童裝同玩具, 仲有少量動漫同卡通既店鋪 (例如龍貓同Hello Kitty等). 

上圖係商店街既其中一條巷既地圖, 睇落好長, 其實好快就行完. 呢個時候, 原來筆者去既當日, 撞正吉祥寺既中秋節, 我地睇下日本人既祭典先啦:

以下落黎係吉祥寺商店街既周邊, 有筆者成日都介紹既Yodobashi之外, 仲有書局同PARCO.