2016年1月16日 星期六

餃子之都 - 宇都宮


上回講到, 離開左日光之後, 搭JR日光線就可以黎到餃子之都 - 宇都宮喇. 由於筆者黎呢度既目的只係為左一嘗地道餃子既滋味, 所以今集只會介紹宇都宮站既周邊, 唔會去睇寺院等既景點. 我地又睇下地圖先:



無論你係由東京搭新幹線過黎, 定係由日光搭JR日光線過黎都好. 同樣係呢個JR宇都宮站落車的, 左手邊就係西口, 右手邊就係東口, 好易明. 而好似香港大排檔咁樣既餃子廣場位於東口. 不過唔好心急住, 我地去西口行下街先.


宇都宮真係周圍都見到餃子, 而位於JR宇都宮西口正對面, 大家會見到上圖呢座有兩隻眼既建築物, 呢座就係Yodobashi喇! 筆者好鍾意行Yodobashi, 雖然日本好多地方都有, 但係入面又大又多店鋪. 特別係玩具同電器既樓層, 一層一個分類, 香港幾大間既電器鋪都比唔上. 調番轉, 從Yodobashi望番JR宇都宮既話就會好似下圖咁.


行完街, 天都黑齊, 去食餃子喇. 行過去東口有條行人天橋, 天橋上面望落去.......





呢度有好多間餃子鋪, 不過有幾間好似係一樣的, 唔理喇, 是但搵間食啦.





今次筆者去左健太餃子, 呢度既賣點係上面呢款一碟12隻不同味道既餃子, 味道再上面既圖就會見到, 真係食餃子都食到飽, 但係呢12隻都只係¥840 (即係$52港幣)抵呢!

想知更多餃子既資訊, 可以去宇都宮餃子會 (http://www.gyozakai.com/) 網頁. 呢度有全個宇都宮既餃子店介紹.


食完之後, 唔好咁心急返東京住, 行下JR宇都宮站大堂先啦.





呢度有間賣半熟芝士撻既鋪, 超好食!!! 好食過香港依傢日日排長龍嗰間. 呢度一隻撻賣¥230(即係港幣$14) 唔算貴啦. 買番盒6隻(只需¥1300)上新幹線食, 又好味又可以打發時間, 約50分鐘就返到東京. 有JR PASS既朋友, 不妨花三四個鐘上黎宇都宮行下食下餃子. 好過喺東京同人逼丫!

最後同大家睇下JR宇都宮站既月台:




(本文地圖取材自谷歌地圖)

沒有留言:

張貼留言