2016年1月4日 星期一

栃木縣 - 日光 / 鬼怒川

日光, 係近年港人常去既新旅遊點. 加上日光市大力宣傳, 仲話日光係日本之光咁話. 所以筆者都專程入黎睇下. 一般黎講, 要由東京市前往日光/鬼怒川溫川的話, 就要由淺草東武線直達鬼怒川溫泉站(特急班次車程約127分鐘), 又或者從淺草東武線栃木站東武日光線前往東武日光站(特急班次連轉車車程約150分鐘). 不過其實, 只要你有JR EAST PASS的話, 除左可以任坐JR線之外, 仲可以搭一條非JR路線的. 就係下面呢條Spacia 鬼怒川號, 由新宿直達鬼怒川溫泉站(只有特急車, 車程約127分鐘).







舒舒服服, 坐左兩個鐘頭, 就黎到鬼怒川溫川站喇. 鬼怒川話晒係溫泉之鄉, 一出站就有免費溫泉比你浸下腳.




不過今日筆者唔係帶大家去浸溫泉, 而係帶大家去探下忍者. 去日光江戶村.



行過少少, 黎到巴士總站呢邊, 搵番3號月台, 就有巴士去日光江戶村架喇, 約一小時一班車, 車程15分鐘, 車費¥410. 




日光江戶村 - 睇忍者表演






落左車, 右手邊就係售票處, 入場費唔平架! 成人每位¥4700, 不過只要你出發前, 上日光江戶村網站下載張優惠券就可以九折入場. 網址呢度> http://edowonderland.net/zh-tw/

繼續周圍參觀下:





















 呢度既一草一木都好有江戶時代既感覺, 你除左可以周圍搵街上面周圍遊既忍者影相之外, 呢度有兩個忍者劇場係非常好睇的(分別係忍者大劇場, 同埋忍者之隱居宅). 你可以近距離睇下忍者武打表演, 忍者飛標等等, 一定要睇! 呢度仲有少量付費既灘位遊戲, 都係射箭同飛標呢啲同忍者相關既野. 可惜當日落大雨, 否則會好似迪士尼咁有大街巡遊, 巡遊時會有忍者喺大街兩旁既樓宇上面跳黎跳去, 仲會喺你面前大打出手, 又係非常精彩的. 肚餓既話, 呢度有足夠既食肆, 食肆反而唔貴喎, 上圖個炒麵都係¥500.

鬼怒川呢度除左呢個日光江戶村之外, 仲有一個大型主題公園, 東武世界廣場, 同樣受遊客歡迎. 東武世界廣場係一個小人國, 內有以1/25比例, 精巧重現包括45個世界遺產在內的102座世界知名建築的世界建築博物館. 入場費¥2500, 一次過去晒東武世界廣場及日光江戶村會有優惠, 大家上佢地既官網就可以睇到. 網址呢度> http://www.tobuws.co.jp/cn/




離開既時候, 影番張巴士時間表比大家睇. 大家可以去番鬼怒川溫泉站轉車去你所住既溫泉酒店, 又或者搭免費穿梭巴士去JR日光站, 轉車去宇都宮, 或者經東武日光站東武線去番東京市既淺草. 今日我地去埋日光, 車程約30分鐘.




日光 - 日本之光





日光係一個充滿歐陸感覺既地方, 所以連個地鐵站都靚過人. 從日光江戶村搭免費穿梭巴士過黎, 一落車就係JR日光站喇. 呢個站得一條線, 就係JR日光線, 目的地係宇都宮, 車程約43分鐘. 從上圖可以見到, 大約一小時一班車. 未夠鐘上車住, 行下日光市先啦.





JR日光站行過少少, 就會去到上圖既東武日光站喇, 而東武日光站既門口就係巴士總站, 大家可以喺呢度搭巴士去你所住既溫泉酒店. 其實日光仲有東照宮, 二荒山神社輪王寺既景點, 不過行程所限, 我地要即刻搭JR日光線宇都宮食餃子喇. 如果大家想玩盡日光同鬼怒川既話, 起碼要兩日一夜先夠.


上左JR日光線, 大家可以睇到呢個路線圖, 就可以知道日光海拔有幾高, 去到宇都宮時有幾低. 不過當然, 搭緊火車時係唔覺的. 最後提一提大家, 由於JR日光線係一條鄉郊線, 所以到站時車門係不會自動開啟的. 要下落車既話, 要自己按制開關門.


車門有指示話比你知架喇. 下一集我會帶大家行下有餃子之都之稱既宇都宮食餃子. 下集見.

沒有留言:

張貼留言