大家應該好熟架喇, 豐田城就係喺Venus Fort旁邊. 一齊入去參觀下啦.
呢部i-Road真係有軚盤的, 定員二人, 即係可以前後坐兩個人, 岩晒香港.
由於筆者係渣Smart Fortwo既關係, 所以專登玩下部IQ, 的確係唔錯. 收埋車尾箱時仲可以坐四個人!! 提提大家, 呢度擺出黎既車都係任你玩的, 你想開門, 坐上去, 開車尾箱睇下有幾大全部都無問題. 如果需要測檢下電器用品既話可以通知職員幫手. 只係唔可以渣.
Porte真係一部好車, 車仔細細, 個車尾箱大到咁. 都唔明點解香港無行貨. =.="
豐田城地下既呢個地方, 就係可以比大家免費/付費試駕既地方. 一般黎講如果你想試渣新款車既話要預早一個月上網Book定, 現場即睇即試既只會淨番舊車款. 呢度有條專用既賽道, 不過時速上限係40公里, 有國際牌就玩得. 未渣過HYBIRD既朋友黎試下車, 感受下的確係唔錯.
近期去到, 原來依傢有Segway免費試玩!! 大家只要夾岩時間黎呢度上一個15分鐘既免費課程, 識玩之後, 就可以免費借用30分鐘. 呢30分鐘入面, 你係可以渣埋部Segway入去Venus Fort商場行街的, 你都咪話唔過引. 不過, 英語課程全日只得一節, 仲要係下午兩點. 筆者唔岩時間所以無玩過, 大家去到時自己夾下時間啦.
上圖呢部係動感遊戲. 比大家挑戰下你手車有幾慳油. 當然又係免費!!
呢度仲有間動感戲院, 即係好似香港既Motion Chair咁. 片長約20分鐘, 每30分鐘一節. 當然又係免費!!
最後, 梗係要玩埋GT 6先好走啦, 閒日黎唔多人排隊, 行埋去即刻有得走. 最重要當然又係免費!!
玩左半日, 一蚊都無洗過, 係時候要破下財, 去東雲汔車超級市場度行下喇!
東雲汔車超級市場 - Super Autobacs
由台場去東雲係要搭JR+TWR線的, 無人駕駛既白合海鷗號係唔到架!!
由台場(即東京Teleport站)過黎只係兩個車站, 車程約5分鐘. 好快就到.
一落車, 望出街, 見到藍紅色廣告既建築物就係架喇!!
一出地鐵站, 望住座建築物, 一路過馬路行過去, 幾分鐘就行到黎呢個門口, 近鏡頭黑色嗰座係賣二手車的, 中間矮矮既係驗車中心, 最後面高高地紅藍色既就係超市, 入口在二樓.
話明係超級市場, 當然有番咁上下大啦, 不過唔好比個牌呃左, 其實係得一層(2/F)可以行, 三樓係洗手間同Cafe. 由於呢度唔容許影相, 就等我用文字為大家介紹下啦.
杜如風小姐介紹大家買呔, BUMPER之類既大型用品, 呢樣大家自己考慮喇, 因為計番兌換都唔係平得好緊要, 只係有啲款香港無咁解.
汔車用品佔左呢度五六行走廊 (即相中黃色一行行既地方), 淨係點煙器一開幾, 或者點煙器轉USB都有幾十款比你揀. 比較吸引我既係倒後鏡之類既野, 又係有幾十款比你揀. 其餘杯架, 電話座, 洗車用品, 噴窗防水既東西呢度乜都有. 就好似去左一間實體既淘寶一樣.
價錢方面, 一定貴過淘寶, 呢樣淘寶係無得輸的! 同香港既汔車用品鋪比較, 呢度會因為兌換既關係而平少少, 唔會平好多. 不過勝在多款揀, 又唔係遠. 所以好值得車迷過黎.
不過要提下大家, 呢度係日本, 所以只會搵到日本車既野. 好似筆者部Smart咁, 呢度就無補品岩用. 可惜!!
(想睇番之前台場篇既請按此 > 台場篇)
沒有留言:
張貼留言