2014年12月1日 星期一

京都篇 - 租單車 / 電動附助單車

終於黎到京都篇, 第一樣要介紹既當然係教大家去邊度租單車好啦. 好多人都會用單車黎遊覽京都, 原因係京都唔算好大, 不過地鐵站又唔近景點, 加上巴士又唔係順路(雖然班次都幾密). 所以呢, 都係租單車好玩好多. 日本踩單車比香港安全得多, 一來, 日本踩單車係踩行人路的, 唔似香港咁一定要你踩出馬路, 二來日本人駕駛態度好過香港多多聲, 絕大部份時間, 單車都係優先的. 不過呢D陣間會詳細講, 依傢講左租邊間單車好先.



大家可以去呢個網址(http://k-miyabiya.jp/access.html)度睇, 呢間單車鋪都算幾出名, 加上佢亦係少數有電動單車租既店鋪, 所以筆者都幾推介大家租呢間既單車. 單車鋪營業時間係朝八半晚七, 加錢可以延遲到晚上十一點先還車. 老闆識流利英語, 溝通唔成問題. 仲有既就係, 老闆為人好細心, 每位客人會送一支水同一份京都地圖比你, 仲要教埋你點去目的地同埋唔可以踩單車既街道.



雖然佢個網寫住京都站出, 行5分鐘就到, 但係我一向都同大家講日本仔所講既時間同香港人所感受既係有好大落差的. 如果你真係由京都站行過去, 我諗大約15分鐘左右啦. 所以本身熟路既我就會搭一個站地下鐵去五条站落車行番轉頭, 咁就真係5分鐘行到去喇. 地點好易認, 東本願寺(即真宗本廟)正對面就係.


一般平時香港租開既 "波車" 大約 ¥1400 -¥1600一天. 不過咁, 京都地圖右半頁(即係清水寺)附近都係上山路段, 用腳踩係好辛苦的, 特別係上清水寺條路好似上慈雲山咁斜, 所以筆者建議大家比多少少錢, ¥2000一天租部B1既電動附助單車.

從上面兩張相大家可以睇到, 呢款電動附助單車同我之前台灣墾丁篇介紹既電動單車係完全唔同的. 呢款單車有腳踏, 而手制上不設油門. 大家只要當佢係一部普通既單車咁去 "踩" 就可以. 部單車感覺到你用力踩既時候, 電動摩打就會啟動, 即是話你只要比好少好少力去踩, 部車就會火箭咁去, 呢個感覺上斜既時候會更加強烈, 好似踩平路咁, 好過癮的. 不過筆者要提提大家, 首次起步時大家會非常唔習慣, 因為你都未用力踩咁滯部車就會衝出去, 所以大家最好搵個空地, 前面好遠都無車無人既時候, 試一兩次起步先, 感受左部車個力之後, 你就會越踩越快架喇.

從上面個地圖睇, 由京都站踩去二条城約20分鐘, 二条城踩去清水寺要40分鐘. 清水寺京都站約20分鐘. 咁大家就可以好容易咁預踩單車時間了. 

京都市除左橫街之外, 大部份主路都會好似上圖咁, 分開行人路同單車路. 條路夠晒闊, 唔駛驚車親人. 另外, 行人路上踩單車係唔分方向的, 即係你向前向後踩都得. 但係如果你踩出馬路既話, 就要跟足交通規則咁左上右落咁踩. (呢點同香港單車既交通法正正係相反的)


成個京都市都係任踩咁滯, 除左兩條呈十字型既街道. 上圖就係其中一條禁止踩單車既街 - 四条烏丸. 出發前, 老闆會在你份地圖上面Highlight定話你知的, 另外你去到路口都會見到禁止單車既路牌. 再唔係既話, 你見到呢條街好似有頂既行人專用區咁, 相信你都估到呢度唔比單車入喇掛?





唔踩單車, 又點可以慢遊京都呢個咁古樸既城市?


最後喇, 又提提大家, 京都係唔可以隨街泊單車的(基本上整個日本都係架啦). 單車要泊單車停車場或者街邊既單車錶位. 另外, 好多網站或者旅遊書都會同你講, 旅遊點既停車場係免費停泊單車的. 但係你睇完上面呢張相之後我可以同你地講, 完全無呢回事!! 租單車既時候, 老闆會叫你幫襯佢買埋呢張 "一日駐輪券" (即係一天任泊), 每部單車收費¥200/一天. 買左之後, 當日在券上所示既11個停車場都可以唔需要另外比錢任你泊. 大家放大佢就會睇到, 大部分旅遊景點, 包括二条城, 清水寺等等都包括在內, 所以無得揀架喇, 買埋佢啦!

上面呢間就係筆者在東京旅遊小貼士都介紹過既 無添加Kura Sushi 喇, 京都都有分店的, 呢間鋪位於二条城附近, 由二条城踩單車過去7分鐘左右啦. 京都既大型食肆都會附設有停泊單車既地方, 免費的. 唔好阻住其他人就可以.

(本文地圖取材自谷歌地圖)

沒有留言:

張貼留言