上一集介紹過瑞芳, 今集要入正題講
"十分" 了. 可能因為 "九份" 的原故, 好多香港人將 "十分" 讀成 "十份". 記住, 係 "十分" 先岩.
其實喺未有 《那些年, 我們一起追的女孩》之前, 十分已經非常有名, 是港台居民假日必到的旅遊點. 無他, 呢度集懷舊, 天燈, 瀑布, 吊橋同鐵路於一身. 真係老少咸宜. 可是, 相信大家同筆者都有相同既經歷, 就係旅遊書無教你點樣由十分行去十分瀑布, 要知道由十分行去瀑布要半個小時. 沿途又無指示又夠晒荒蕪. 另外又無介紹好特別既煤礦博物館. 所以本文會比較集中以上兩項. 至於其他的......睇相都夠吧!
搭車既方法同時間表我會放喺本文底, 但係先講下以下呢張一日週遊券先.
平溪線沿線上上落落都係NT$20 一程. 所以如果你會上落四次的話, 買呢張週遊券NT$80 就最抵喇. 另外, 其實平溪線沿線都係景點, 如果你有時間的話, 可以玩多一兩站, 否則, 就集中十分同菁桐吧, 呢兩個點已經夠你玩半天了. 一日週遊券發售地點包括板橋, 台北, 松山, 基隆, 八堵及瑞芳站.
由瑞芳到十分, 要坐小火車.
十分車站
對呀, 十分就是古樸的地方, 當然要走路軌吧.
十分老街, 一幅大家在電影或網站經常都會見到既情景, 老街既正中間就係路軌, 所以當有火車行過就要讓開,
兩旁都係賣當地特產既店鋪.
大笨蛋! 一場黎到, 你都買番盞天燈放下啦. 唔買都得, 買天燈型座枱燈都得!
好喇, 要帶大家去十分瀑布喇. 先睇下幅地圖先, 中下方既就係十分車站, 跟住無論你選擇上路定下路,
都可以去到一個交匯處 (平交道), 然後再向 "下山" 既方向行就會見到十分旅遊服務中心, 之後......睇左相先吧.
上圖係十分老街 (左邊係上路, 右邊係下路. 如果你想去煤礦博物館既話就一定要行上路)
上圖係平交道
當你去到十分旅遊服務中心, 表示你已經行左路程既一半. 喺呢度, 你可以飲杯野同埋做最重要既事......去洗水間. 之後你就要行 15 分鐘山路架喇. (未計回程喎 =.=" )
跟住, 喺十分旅遊服務中心既背面, 你會見到條吊橋, 過左吊橋就有一段山路, 呢段路有山有水, 可以影多幾張相, 沿途得一條路, 又有指示牌, 唔怕迷路.
當你去到上面呢條橋既時候, 右手邊就係火車橋, 再向前行就會去到十分瀑布. 但係呢個時候, 我要同你講個壞消息. 因為有私人公司買左十分瀑布對開的空地做公園 (呢個公園同大棠荔枝園差唔多.......咁流) 所以如果你想影十分瀑布的話, 就要比錢入去先可以影到. 幾錢筆者就唔記得了, 唔會太貴的, 應該是一百元台幣以下一位的.
可是, 我無打算益佢.
煤礦博物館
煤礦博物館係一個介紹十分呢個地方既由來既好地方, 十分以前係一個煤礦, 而博物館正正就係採礦場既前身, 全部實景. 想去既話呢, 就由十分老街, 往上路既方向行, 就會見到以下呢座建築物.
下面有間屋仔, 賣手信同入場門票. 筆者又唔記得左幾錢了 (真無用), 放心啦, 唔貴的. 之後沿指示牌行幾百級樓梯上山, 沿途都係採礦既舊蹟.
上到山頂, 有上圖所示既 "火車站", 你去到一定唔信呢個就係火車站, 不過只要你等一陣, 就會有架 "小" 火車出黎載你去博物館, 車程約5分鐘, 免費的. 這是參觀博物館的一部份. ^^
交通指南:
上一集 "瑞芳" 時介紹過, 由台北往十分, 必須經過瑞芳, 再轉乘平溪線小火車. 請留意, 由於星期六日旅遊人士極多, 而平溪線小火車每列只有兩卡車, 加上班次極疏. 故此筆者推介大家閒日去十分會比較好. 另外, 由於平溪線沿線大部份路段係都係人車爭路既地方, 所以假日時晚點甚至係發生交通意外都係家常便飯, 請小心安排你當晚既行程.
(附上平溪線班次表供大家參考, 以方便大家可以來往平溪線各站, 預留時間遊玩)
新平溪線時間表 (16年06月10日起生效)
另外, 筆者為大家列出了好幾班由台北經瑞芳去十分既列車班次供大家參考. 呢幾班車係轉車時間相隔最短的, 如果你想行下瑞芳的話, 就可以不理了.
(車種 / 台北開出時間 / 到達瑞芳時間 / 瑞芳開出時間(平溪線) / 到達十分時間(平溪線)
自強 / 06:30 / 07:08 / 07:23 / 07:51
自強 / 09:00 / 09:35 / 10:03 / 10:37
區間快 / 10:10 / 10:54 / 11:08 / 11:37
莒光 / 11:55 / 12:37 / 13:05 / 13:32
區間快 / 12:18 / 12:59 / 13:05 / 13:32 (轉車時間太少, 非出意外的話, 不建議)
公車方面, 來往瑞芳及十分之間的公車班次極疏, 每天只有數班公車而已, 加上山路顛簸, 故筆者不作介紹.
(以上部份相片來源自Google Map)
沒有留言:
張貼留言