大阪篇 - 心齋橋 / 美國村

大阪篇, 其中一個最重要既SHOPPING地點, 當然係心齋橋啦. 一條長長既步行街, 乜鬼鋪頭都有. 仲平好鬼死平同好多款你揀. 不知幾開心. 不過今日介紹心齋橋之前, 我地睇左個地圖先, 因為筆者想介紹間酒店比大家.

Best Western Hotel

今次為大家介紹既係呢間Best Western Hotel, 呢個係集團式既酒店, 單單香港已經有三間分店. 所以係有質素的, 就連Flyagain都有推介過呢間酒店比網友. 另一方面, 呢間酒店係勁近長堀橋站, 落車行五分鐘就到, 而長堀橋距離心齋橋只係一站之隔, 就算你唔想花錢搭車, 行都只係20分鐘左右. 另外再提一提旅遊書無提過既野, 就係長堀橋站同心齋橋站之間其實係有一條地下商店街連接住的, 裏面有好多食肆, 少量藥房同美甲店等等. 所以如果落雨既話, 可以沿地下街過去心齋橋站. 

心齋橋

依傢由酒店出發, 行過去心齋橋比大家睇.

當你去到上圖既位置, 表示你已經到左心齋橋既入口, 不過我地唔入去住, 向張相既背面出發左先.

呢邊既心齋橋比較少人行, 睇既野亦唔算多. 以下行番去真正既心齋橋喇.

黎到大阪點可以唔試下箱壽司, 唔好睇佢好少咁, 其實件壽司飯壓到咁實, 食幾粒已經好飽. 食飽就要周圍行下街喇, 心齋橋係出名平的! 最平要數GU, GU係UNIQLO既旗下品牌, 主打年青人平價衫, 一件T-Shirt賣廿幾蚊港紙都有. 另外女仕們常去既WE GO呢度都有. 唔少得既常然係夾公仔啦. 

美國村

行完心齋橋, 過去地圖既左手邊, 呢度統稱為美國村, 比較多HIP-HOP, 同歐美既品牌, 當然仲有動漫野啦.

上圖呢間Mandarake, 樓高三層, 有動漫, 合金玩具, 色情POSTER等等乜都好, 如果大家好記性既話, 筆者東京篇介紹中野都有呢間分店. 

呢間鋪好似係餐廳黎, 係愛麗斯主題野, 連個入口都細過人, 張相可能感受唔到有幾細, 其實一個成年人行埋去度拱型門既時候, 度門只係去到心口位置.

最後, 我要向大家對個歉, 最後一個必到既景點係一個叫BIG STEP的商場, 裏面有賣足球波衫既店鋪, 亦有一層係專賣COSPLAY, 歌德時裝既鋪. 我老婆豬話歌德書介紹既就係入面呢間.....不過講左咁耐, 筆者當然開心到唔記得影相, 所以只可以作文字介紹, 見諒.

(本文地圖取材自谷歌地圖)