大阪篇 - 道頓堀

道頓堀位於心齋橋同難波之間, 打橫既一條河以及附近既一條飲食街. 最出名既當然係大大個固力果廣告牌同埋激安啦, 亦由於道頓堀夾喺兩個旅遊點之間, 所以無地鐵直達, 就算夾硬黎計, 最近既都只不過係 "日本橋" 站. 所以一般遊客都係由心齋橋出發, 一路行到去道頓堀順手食埋野. 今集除左會講條河之外, 仲會介紹兩間食肆比大家, 一間係極出名食蟹既, 另一間就係排隊排成個鐘既大阪燒.

睇到呢度, 補充小小啦, 上面見到有張相寫住 "戎橋筋", 同心齋橋一樣都係一條買衫既步行街, 一路直行就可以去到難波. 而我拍照既地方, 亦即係戎橋筋既正背面就係心齋橋喇.

首先玩左條河先, 上船喇......

全程大約20分鐘. 每人Y$700, 售票處位於激安門口. 星期六日勁多人, 要下午買定夜晚飛, 閒日會好D. 最夜收9點. 好喇, 坐完船行陣街先.

一入戎橋筋左手邊第一座大廈就係上面呢間咁靚咁大既Starbucks, 再樓上係賣CD既地方, 咁岩當日有船梨精展所以影左幾張相, 呢座野最岩用黎等人. 所以介紹左比大家先. 之後繼續行.

美津の - 大阪燒

跟住去食大阪燒喇!! 呢間叫美津の. 位於道頓堀中間既一條巷行入去 (見下圖)

上面呢間就係喇, 有中英文餐牌的, 入面唔算好多位, 所以一般情況你都要預左等一粒鐘.

上面係我張枱,  師傅係會喺你面前即整的, 所以好睇好食. 不過師傅整野食其間係嚴禁拍攝的.

整好喇, 一路熱住佢一路逐少逐少咁食. 呢兩件野, 每件百幾蚊港幣. 抵唔抵? 一件都幾飽肚架.

蟹道樂

好喇, 食完大阪燒, 第二日, 筆者去左食蟹.

呢間蟹店, 道頓堀好似有兩至三間分店. 同樣有中英文餐牌的. 入去食野要除鞋的, 所以想去食既話, 著輕便D會方便好多.

最貴既餐都只係四千YEN, 由生蟹到熟蟹都有得食. 鍾意食蟹既朋友一定唔可以錯過!! 咁當然, 我都知杜小姐教大家唔好幫襯呢間, 改去食第二間蟹店. 只可惜既係, 當佢介紹完之後, 嗰間蟹店已經被人攻陷左. 我都唔想再講喇, 有時香港人做既野同強國人係無分別的.