台場 (2017年5月更新)

好喇, 今集寫台場. 台場係一個非常適合年青人去既地方, 因為這裡充滿新奇刺激的東西. 有新起既高達館, 豐田城, 前全球最大既摩天輪, Legoland, 蠟像館, 總之寫都寫唔晒. 大家睇下個地圖就明點解我寫得咁辛苦, 真係想搵個位寫野都無. (中間紫色既係一橋行人天橋, 連接住台場既兩端, 極之方便, 步行約5-10分鐘.)

前往台場既交通方法好簡單, 只有兩種鐵路可以去到. 第一種係無人駕駛列車, 白合海鷗號, 亦即係地圖上面淺藍色繞住台場黎行果條線. 白合海鷗號既好處正如地圖所示, 佢係服務台場遊覽既乘客, 所以有好多個站並且好接近各個景點, 佢仲有一回無限任搭既一日券. 不過說實話, 佢單程既收費已經比平常既JR貴. (印象中搭幾個站已經要￥5XX), 不過佢係唯一一條會行經彩虹橋既鐵路, 所以幾貴都好, 筆者都推介你搭白合海鷗號前往台場, 順手喺彩虹橋上面向海影番幾張相.
JR山手線沿線 > 新橋站(轉白合海鷗號), 或者 METRO沿線 > 汐留(都可以轉白合海鷗號).

而另一種前往台場既方法, 就係搭JR+TWR, 即係埼京線直通, 就可以由池袋, 新宿, 澀谷方面直達地圖正中央既 Tokyo Teleport站. 由新宿出發約30分鐘, 比白合海鷗號快一倍. 缺點當然係佢離景點比較遠, 而且只得呢一個站. 不過回程趕返酒店搭就的確唔錯, 夜晚十一點都仲有車.

台場景點：

1) Decks Tokyo Beach

呢度係台場其中一個大商場, 一般來說, 黎得台場, Decks Tokyo Beach同旁邊既Aqua City就必到架喇. 因為行街食野都集中晒起呢度. 否則就要行過去摩天輪果邊先有另一個大商場Venus Fort. 不過如果講食野同普遍程度都係行Decks Tokyo Beach啦. 

先講下Decks入面呢間Joypolis先, 如果用機鋪黎形容佢就實在太過睇少佢. 幾年前去日本時筆者有入過去, 入場費唔平的, 等於你去香港迪士尼既門票一樣, 入到係任玩機動遊戲的, 無錯, 係機動遊戲. 裡面樓高五層, 有室內過山車, 動感遊戲, 仲有全球得三部(起晒呢度)既實物原大動感頭文字D. 由於我以前無諗過寫旅遊BLOG既關係, 又掛住打機, 所以無影相. 今次再去, 無時間入去打機, 唯有起門口影張相算, 喜歡打機既朋友, 唔好錯過. 嫌貴既可以下午或夜晚先入去, 由於佢係無限任玩既關係, 所以越夜入場收費會越平, 但係入面排隊既人當然會越黎越多. 而2017年最新既遊戲機就係上圖呢部Zero VR, 係一部真人打喪屍遊戲, 你帶住隻VR眼鏡, 幾個人一隊衝入去殺喇!!

Legoland 及 蠟像館

蠟像館香港都有啦, 所以筆者去左Legoland, Legoland入面唔算好大, 但係越對夠晒驚喜. 如果大家想慳錢既話, 下面有大量相片比你過下癊.

呢部係真LIFT, 入去喇.....

車係識行既, 另外你一路等佢係會由日轉為夜, 之後當然街燈招牌會著, 然後又到番朝早. 呢度無人會趕你的, 影相拍片都可以, 其實我拍左, 可以去我ThatsWhys Travel既Facebook度睇下. 另外, 機動遊戲得一個, 入面有間小食店, 食下熱狗同飲可樂. 同埋小朋友黎會開心D, 因為呢度有個位係有無限LEGO比你砌, 否則好似我咁大既話, 慢慢行, 慢慢影, 一個鐘內點都行完. 臨走既時候記得買LEGO走, 呢度有部份MODEL外面買唔到的.

Decks入面有一層叫做台場一丁目商店街, 以前有條叫香港街添, 不過依傢無左架喇. 呢度既裝修同賣既野都係古日本時候既東西, 例如鐵皮玩具等等, 2017年仲開埋Food Court添. 唔多講了, 睇相你就明, 幾好睇幾好行架.

跟住有飲食推介!!!

喺五樓呢度有間食肉既店鋪叫 "醍醐", 主打係和牛. 唔貴的, 同香港比簡直係平. 如果你好食得既可以揀佢既任食放題, 好似四百蚊港紙一個人. 不過和牛只係4A級數. 如果你想食最高級既5A和牛, 就要學我咁散叫....

呢度環境一流, 仲可以望住彩虹橋黎食. 放心啦, 唔貴的, 睇埋落去啦....

上圖第一張係七色和牛, 店員話叫左呢碟先, 然後記住個味再散叫嗰一味既和牛. 我同大家講, 七種味各有特式, 最後我同老婆豬決定叫第一色, 即係第二張相. 店員推介我地食鹽燒味既和牛, 佢仲有幾種比你揀的, 我唔記得了. 不過由於我唔食辣, 所以就揀左鹽燒. 肉佢預先調好味架喇. 唔似香港咁叫左鹽燒都係無味. 總之, 你喺呢度食過A5和牛之後, 返到香港你唔會再有興趣食香港所謂既和牛. 而呢一間埋單, 約一千港幣.


不過和牛食得多都會厭. 2017年筆者帶大家去食壽司. 杜如風話佢成日黎食架!!

築地王壽司喺日本有好多間分店, 不過只有台場呢間係任食的. 就係喺正話介紹既醍醐既樓下 (簡單講即係4樓啦). 男士任食￥4860, 女士￥3780. 你入去之前可以睇下門口個牌, 佢會寫明當日有咩野有得食同無得食. 睇唔明日文唔緊要, 入到去有中文或英文翻譯既餐牌比你, 仲要係圖文並茂的. 由於店內唔方便影相既關係, 等我用文字同大家介紹啦. 入到去之後, 有Bar 枱亦有Order枱, 我當你坐Bar枱計, 坐低左之後, 唔駛心急, 慢慢睇下餐牌, 有人會開始問你飲水定茶. 喺你前面有幾位壽司師父, 大約係一個師父服務三至四Pair客人, 佢會逐pair逐pair咁問你食乜野, 所以唔好好似大陸人咁9叫, 師父一定會問你, 你等就得架喇. 所有壽司即叫即整, 但係放心啦, 你一定夠時間食. 而食到咁上下, 佢會送一碗味噌湯比你, 呢碗湯非常邪惡. 因為你明知佢係想搵碗湯質飽你. 但係當你睇到碗湯有一大隻原隻大蝦之後, 就忍唔住咬落去, 再飲兩啖, 之後你就中晒招!! 碗湯超好飲, 好多料, 都係飲飽佢算啦. 另外, 每日仲會有一樣餐牌無寫既野食, 佢地叫做 "Special". 每人限一碟(2件), 你食到咁上下同佢講Special就可以. 又講番食物先, 以我所知最貴既野係去到 "中拖羅", "海膽"等等. 仲有好多不知名既魚, 總之餐牌有既野我都叫左一轉, 當中 "中拖羅" 梗係encore幾次啦. 呢度限時但係唔限叫, 所以每次叫兩三碟就夠, 下一轉再叫過, 唔好叫到成枱都係失禮死人. 食完兩三碟, 岩岩好師父又服務到你.

2) 富士電視總部

第二個近年必到既旅遊點, 就係富士電視總部, 入面有好多富士電視製作既電視海報同紀念品買, 就好似當年香港既YES! SHOP咁. 仲要係免費入場, 咁你仲想點, 入去啦!!

VS嵐呀!!! 因為香港有J2既關係, 令到呢度多左香港人去, 當然仲有比人惡搞埋既矛盾對決啦. 呢度有幾個景係比你扮主播影相的, 不過筆者唔靚仔, 唔POST了. 可能大家去到會問, 點解明明免費入場, 但係地下同七樓都會有人叫你買飛既呢? 原因係, 如果你想上去25樓既球型展示館的話, 就要另外購票, 票價￥500. 有咩特別? 除左可以居高臨下咁睇下台場之外, 仲有一份紀念品送番比你(唔知毛巾定貼紙了), 我無上到, 大家去完再話我知啦.

之後, 我地沿住地圖紫色線, 即係行人天橋, 行過去台場既另一端.

呢度係Palette Town, 包含有女士商場Venus Fort, 男士最鍾意既豐田城, 同埋情侶必去既摩天輪.

呢個豐田城對喜歡車既朋友絕對係聖地. 呢度除左展示左新車同概念車之外, 仲有遊戲機同埋真車比你渣! 有國際車牌既可以起出發之前約一個月上網預約, 有大量新車比你試渣, 免費的!! 無車牌既朋友無問題. 現場有新車比你扮渣車, 果種叫E-com Ride. 唔駛車牌都可以玩, 部車係真的, 水潑, 冷氣, 車頭燈總之真車有既野你都可以正常使用到, 除左軚盤同油門. 部車係自動行駛的, 你既工作係扮司機就可以, 繞一個圈約5分鐘, 收費係￥200一個人, 一家大細上車過下癊都唔錯架.

最後去埋摩天輪, 不過筆者幾年前無影到相, 今次去又唔記左之前無影相, 所以無相比大家睇. 不過呢個摩天輪係極之大, 轉一個圈要十幾分鐘. 當中有幾個係全透明既車箱, 不過呢個比台灣既高咁多, 少D膽量都唔好試. 而摩天輪既下面有間機鋪, 呢間真係機鋪了, 同香港既機鋪一樣, 玩下賽車同格鬥GAME, 仲有夾公仔同埋九公格!!

射呀射, 射他吧. 贏左無無獎架. 玩下ONLY. 不過現實中, 筆者係一個門將. 腳法就差D架喇.

好, 台場篇完, 但係其實台場仲有高達館, 船之博物館等等既好地方. 只係筆者無興趣無去到, 大家不妨花一至兩天時間喺台場度玩, 有問題想問既請留言或者電郵去thatswhycmidi@yahoo.com.hk度問.

最後送上高達館既網址: http://gundamfront-tokyo.com/hk/

(以下內容於2014年2月追加) 
2014年二月筆者再去多次, 當然要補番之前無影過相又或者無介紹過既景點啦, 先補回大摩天輪既相片.

跟住就介紹Venus Fort喇, 上文講過呢個商場好似澳門既威尼斯人商場, 又或者話好似高雄既義大世界. 

喺Venus Fort裏面仲有上圖呢間咁靚既Hello Kitty Kawaii Paradise添! (2016年已執)

最後要介紹比大家知既係, 白合海鷗號既新車!!

加左車, 班次都密左, 最密5分鐘已經有一班車, 加上大家都見到上圖新車既內部, 用番平時市區車既打橫座椅, 載客量大好多!


汔車迷可以繼續睇埋下面既 "東雲汔車超市及豐田城篇"
>http://thatswhystravel.blogspot.hk/2015/12/blog-post.html


(本文部份相片取自谷歌地圖)