池袋 (2014年2月更新)

聖誕快樂. 祝大家出入平安, 空喼去滿喼返. 大家都知道, 筆者二月會去沖繩結婚, 順道會去埋東京玩. 所以我好想二月前寫好晒東京篇, 咁二月就可以開始寫沖繩. 不過講就咁講, 依傢東京篇除左今集既池袋之外, 仲有上野, 東京鐵塔, 自由之丘, 水道橋(DOME CITY)同都電荒川線未寫. 所以呢個聖誕假期要勤力一點了.

今集介紹池袋, 每本旅遊書都必定會寫 "東武在西口, 西武在東口" 呢句野. 原因係, 池袋地鐵站東出口既商場係西武, 但係西出口既商場反而係東武, 問你死未? 不過咁, 除左你去酒店之外, 池袋既景點集中在池袋東口的, 所以記住東口就可以. 交通方面應該唔駛點介紹啦, JR, METRO各條路線都有池袋站, 而出口亦都係一樣, 所以呢點就唔多講了, 又睇地圖先! (地圖於2014年2月更新)

池袋有幾個好出名既景點, 一個係Sunshine60 Street, 呢條街有間大藥房, 不過其實日本既藥房好似香港既萬寧咁, 除左藥之外, 仲有好多護膚品賣, 加上一間藥房有三四層樓高, 好岩女士們去; 跟住唔少得既當然有Tokyu Hands, 仲有SunShine City, SunShine City入面仲有個好出名既水族館同埋Namja Town(詳情請睇Namja Town分頁). 所以池袋的確係好好玩既地方, 至少夠你玩半天. 本文筆者仲會介紹兩家非常好食既店鋪, 一間係賣拳頭咁大既章魚小丸子, 另一間係食牛肉飯既原祖牛肉飯. 好啦, 我地由池袋東出口出發......

上圖就係西武 (即係池袋既東出口了), 而筆者身處既地方就係激安.

經過一條大馬路之後, 向左轉就會見到下面呢間BIC Camera Outlet, 平唔平我就唔知啦, 大家可以去睇下.

呢間相機鋪旁邊既行人專用區就係Sunshine60 Street了. 2014年2月仲新開左間Uniqlo添.

好喇, 沿住呢條街行到尾, 右手邊就係Tokyu Hands, 而Tokyu Hands旁邊有條隧道通往SunShine City的.

大家有福了, 因為Namja Town去年四月大裝修 (即係筆者去既時候) 所以大家依傢去就岩晒時候喇! (2014年2月筆者再去時已經開番了, 詳請請去Namja Town分頁)

無得去Namja Town, 唯有去SunShine City對面既豐田城睇下車.....

呢度唔單止有車睇, 仲有車玩添. 呢度有GT5玩, 仲有條獨家既日本賽道添. 不過依傢應該係玩GT6喇掛? 

另外, 在豐田城旁邊, 有一座Animate, 大家喜歡動漫野既可以去睇下, 而Animate旁邊仲有一兩間賣漫畫同二手公仔既店鋪, 如果你夾公仔唔叻既話, 可以起呢度買番隻返香港扮夾中. 反正當地人夾公仔當正職既原因都係因為公仔可以轉售. 講咁耐, 我地去醫肚了......

呢間元祖牛肉飯店係一字型設計, 一張長枱坐六個人左右, 非常唔起眼. 不過呢間牛肉飯超級好食, 牛有牛味, 個燒汁又一流. 價錢仲非常咁平, 一碗飯好似係HK$50左右, 大家可以去試下. (不幸地, 呢間鋪已經於2015年起執左, 不過唔緊要, 元祖牛肉飯有好多間分店的, 例如新宿既歌舞妓町入口附近已經有間)

食完飯記得過幾步過黎食小丸子, 呢間野非常出名, 但係位置並唔起眼, 大家睇住地圖行, 間鋪係面向橫街的, 正面係一座大型機鋪SEGA. 呢間章魚燒每粒小丸子都係拳頭咁大. 不過味道出奇地好食, 仲要好多汁, 上圖我影左佢咁多種口味比大家知. 等你未出發都可以揀定先.

(本文地圖轉載自谷歌地圖)