東京灣 - 海之螢火蟲

平時大家睇日本片, 總係會見到東京灣上面有條橋, 去到一半就斷開左. 而斷開左呢個地方就係今集既主角 - 海之螢火蟲(Umihotaru) .

前往海之螢火蟲既方法, 就係先去上一集介紹過既川崎搭巴士前往, 車程約40分鐘. 由JR川崎站, 東口出, 就會有一個大巴士總站, 不過部巴士不在巴士總站內, 而係要行過對面, 22號月台. (詳情請睇番上一集川崎篇)

搭前往 "木更津" 既巴士, 車費係¥1050. 但係記住, 只有指定時間內既巴士先去到海之螢火蟲. 閒日就由上午9時至下午5時22分之間. 而星期六日會好一點, 由上午9時至晚上7時52分都有車, 班次係約30-60分鐘一班.

呢度唔係好大, 得兩層樓. 好多野食但係無野好行, 除左間超市. 在筆者既角度, 其實呢座海之螢火蟲係比旅行團或者職業司機食飯既好地方, 方便佢地過海之時, 有個地方泊車, 跟住食野. 而對遊客黎講, 最開心既應該係可以去頂樓度影相, 360度任你影東京灣全景, 可以望到海濱架!

呢邊望過去就唔見左條橋, 因為條橋去到海之螢火蟲之後就會變左隧道. 下面個角度望過去就係大橋. 有趣嗎?

頂層仲有個Food Court以及幾間食肆. 講過啦, 呢度係食野既地方.

最後提醒大家, 雖然部巴士係以木更律 (西口7號月台)為總站. 但係木更津出番東京要兩個幾鐘同埋要轉幾程JR先到. 所以最好都係原車走, 返番去川崎. 反正川崎又有野行, 返東京又近. 至於點解大家睇到上面呢張JR木更津既相? 好簡單, 筆者唔中伏, 又點有經驗寫呢篇BLOG比大家?