上野

上野係一個岩晒大人細路哥既地方, 呢道有賞櫻花最好既地方 - 上野恩賜公園. 又有上野動物園, Yamashiroya, 海味街, 阿美橫町商店街, 仲可以唔駛排隊食一蘭拉麵, 係咪好想去呢?

從上面地圖可以睇到, 我所講既海味街, 波鞋街等等其實就集中喺 JR上野與及 JR御徒町之間既天橋底, 無錯, 大部份既店鋪其實係位於JR火車天橋底下面, 慢慢行你就會發掘到好多好野. 而上野恩賜公園同動物園都係位於地圖既左上方. 好易搵的, 先讓筆者介紹下上野恩賜公園.

上野恩賜公園

沿JR上野站既 "山下口" 出, 就會見到上野恩賜公園既入口. 

呢間Starbucks幾有型!

好多香港人每逢三月尾四月頭都會黎上野恩賜公園呢度影櫻花. 大家可以見到, 沿住公園兩旁既櫻花園, 的確係靚到不得了. 可是由於國際環境既問題, 開花既時間比以前難預計. 好似2013年咁, 我朋友原本買定機票四月去賞櫻, 但係點知我三月去既時候櫻花已經開晒. 結果無心插柳既情況下益左我, 亦益左大家可以睇到咁靚既相. 除左櫻花之外, 呢個公園入面仲有幾座廟.

下面既相係來自地圖左手方有一個湖既中間既一座廟, 不過原來除左廟之外, 仲有野食賣, 好以花市咁.

好喇, 行完公園要去行下街喇, 如果我地從JR上野既 "淺草口" 或者 "不忍口" 出, 正正對面就係Yamashiroya, 係一間賣玩具動漫野既地方.

跟住我地睇下個細地圖先.

喺Yamashiroya旁邊紫色線果條街就係波鞋街, 以前好多賣鞋既店鋪. 可是依傢已經被彈珠鋪頭取代左, 只有少量賣鞋既店鋪. 但係再旁邊藍色線既海味街同化粧品就依舊存在. 記住, 店鋪係位於JR火車橋底下的. 行到去你就明架喇. 不過呢度既店鋪要11:00am左右先開始開門, 太早黎既話就要行陣公園先.

行完之後, 大家可以經由METRO上野御徒町步行去上野廣小路站(即係地圖上野御徒町站左手邊日文字既火車站)搭銀座線直達淺草. 車程約10分鐘.

行完街要食野又點算呢? 我地又從JR上野站講起. 上野站 "不忍口" 旁邊就係香港好出名既 一蘭拉麵, 日本唔駛排隊架, 係香港店先咁鬼多人貪新鮮. 而從 "不忍口" 至 京城上野之間, 有一座小商場.

呢個商場唔大的, 但係食肆就好集中, 方便大家行到攰就入去食D野. 

記唔記得日本鐵路篇既時候我有介紹過京城上野呢個車站, 呢度就係搭Skyline去成田機場既站了. 所以上野呢個景點的確係進可攻退可守. 一般我會介紹朋友去完淺草過黎上野咁玩一日, 又或者留番行程既最後一日, 將大型行李鎖喺京城上野站入面既大型LOCKER, 然後喺上野玩半日, 提多一次, 京成上野站搭Skyline往成田機場只需40分鐘. 所以玩到好趕都唔怕!

(本文地圖取材自谷歌地圖)