想去博物館, 先要去大宮站, 再轉NEW SHUTTLE(新小火車)就可以去到. 由新宿, 澀谷, 池袋等地方出發, 可以搭湘南新宿(上圖紅色線)前往, 新宿出發需時約30分鐘, 約￥540. 由東京方面出發可以搭京濱東北線(上圖淺藍色線), 車程約45分鐘. 當你去到大宮之後, 周圍都係指示牌, 好易搵的.
步行大約5分鐘就會去到另一個月台, NEW SHUTTLE好得意架. 一卡車一度門. 有司機一人操作但係用膠車軚.
搭一個站就到鐵道博物館站, 約3分鐘車程. 跟住又係跟指示牌行, 好快就去到博物館正門.
入場費為成人￥1000, 小童￥500. 開放時間為10:00 - 18:00 (17:30後不能入場). 逢星期二休館. (記住喇). 入到去有免費既指南攞, 有繁體中文版的. 非常體貼, 唔好話我無提你, 一入到去即刻轉左, 然後RUN!!
一路跑, 然後就會出左去室外, 之後你就會見到眼前呢個景. 山長水遠入到黎, 梗係想試下自己渣火車啦. 呢度有6部 "微型運行列車" 比你渣一圈, 一圈車程好似係20分鐘, 中途有4個站, 收費係￥200一部車, 每部車可以坐三個人. 可惜既係, 筆者去到時, 仲有飛既時段已經係下午5點, 因為行程關係, 所以我無玩到. 慘情!!
玩唔到微型運行列車, 起佢旁邊有部免費既 "微型往返車" 坐. (所有既名稱我係根據佢個博物館手冊寫的, 方便大家對照).
呢部迷你子彈火車係來往博物館主大樓同圖書館的. 而兩座大樓之間就係上面講過既微型運行列車既地方, 所以你唔搭車, 就咁行都唔係好遠. 講都無咁好彩, 筆者去到第一抽車滿座, 要坐第二抽, 即是話可以坐車頭, 同靚女車長獨處一卡車! 佢一上車, 見到我一個人坐, 然後一個90度鞠躬再加一個甜美既笑容, 然後講左一堆我聽唔明既日文, 就坐在起我前面渣車. 唔怪之得咁多人鍾意去日本.......(比人扭耳仔中)
圖書館唔係好大, 我又唔識日文, 行個轉就返去主大樓. 其實除左微型運行列車(個名有冇咁鬼長呀?) 之外, 呢度仲有好幾部模擬駕駛倉比你免費感受下渣火車既感覺, 有幾部仲識搖既添, 坐上去同渣新火車無乜分別. 但係講明係免費, 極多人排隊, 所以筆者又無機會玩. 慘情, 睇相吧!
跟住再介紹多一個必到既地方比大家, 就係位於主大樓二樓既 "鐵道立模型館", 呢度係按時間分段開放的, 每節約一小時, 有專人講解, 不過我聽唔明. 淨係睇下面既相片, 你就知呢個模型有幾大!!! 仲要入面所有車都識行識走. 無言!! 睇啦!
好喇, 以下太多相片, 唔逐一介紹喇, 簡單講, 呢度大部份既列車模型都可以比你自由上車影相的. 另外有少部份會有透視機件比你望下內裡既構造. 睇晒下面D相之後, 我就會再介紹呢度既餐廳.
主大樓既天台, 都係好多人去既地方, 因為大宮站係有新幹線途經既車站, 所以好多人上黎影火車.
仲有室外既兒童遊樂場.
講到食野, 呢度有一間餐廳同兩部餐車, 餐車既意思係真係一卡真火車既餐車卡, 不過相然係唔會郁, 亦都無路軌. 只係放左一卡起度等你可以上車食野, 感受下而已. 由於餐車太多人, 所以筆者食餐廳.
上圖外面果部就係餐車了. 由餐廳望出去, 可以見到湘南新宿同埼京線等經過. 以上面呢碗飯加飲品, 盛惠￥850.
(本文JR路線圖轉載自JR EAST網站)
沒有留言:
張貼留言