2013年9月1日 星期日

箱根總覽(箱根湯本,大涌谷)

箱根係一個泡溫泉既好地方,跟據小田急既介紹,淨係箱根內既著名溫泉旅館已經有17間。仲未計遠少少既仙石原御殿場既溫泉。另外,去箱根既另一個目的,就係上火山(大涌谷)了,大涌谷最出名既就係黑色雞蛋(黑玉子蛋)了。最後當然唔少得坐海盜船遊覽蘆之湖啦,聞說蘆之湖既湖水係暖架喎@@" 好喇,喺介紹之前,再長氣D講多一次。地方太大既景點我會分幾篇黎寫,而呢一篇(即係本文)就會係總覽,先簡介每個景點有咩好玩好食好睇。等大家方便D去PLAN行程,之後會有獨立既篇章去介紹唔同既景點。

開始之前,有一個問題係我當時出發前搵極都無答案既。就係一日來回箱根連大涌谷可唔可行既呢?答案原來係:可以既!筆者就係朝早十一點左右由新宿出發,夜晚八點左右由箱根湯本走。中途仲可以去埋強羅,再搭吊車上大涌谷,再坐埋海盜船去元箱根港,兜一個轉再番翻去箱根湯本走,玩齊咁多種交通工具添。唔明我講緊乜?咁睇地圖先啦。


大家暫時睇紅色字就夠喇,箱根入面主要需要停留既地方,就係上面幾個紅色字:


1) 箱根湯本







東京市長途鐵路既總站,搭Romance Car的你係要喺呢個站落車的。箱根湯本小田原之間有區間車穿梭來往(日後再講)。箱根湯本亦可以講係整個箱根、大涌谷既起點,呢度可以搭巴士去仙石原御殿場,亦有巴士去元箱根港箱根町港。各大溫泉酒店亦都有專車喺呢度接客。係值得停留的一站。呢度有大量餐廳,小食店同手信鋪。雖然地方唔大,但係預一個小時行街應該都夠。如果大家好似我咁即日來回的話,就唔好浪費時間住,回程黃昏返黎先慢慢行都未遲。


2) 強羅




箱根湯本搭"箱根登山鐡路"約40分鐘就黎到強羅,呢度係上大涌谷既一個中途站,呢度有多間溫泉酒店,亦都有好幾間餐廳同手信鋪。上山之前,不妨喺呢度食個飯先走,否則上到去火山就無啖好食架喇。加上呢度既餐廳都唔算貴。


3)  大涌谷




大涌谷當然係遊箱根既重頭戲。上大涌谷要搭吊車(下文會教大家買Package的,因為單程正價都要¥1300)上到去,唔駛多講啦,下文再詳細介紹。


4) 蘆之湖 




蘆之湖就要搭海賊船,如果你係買PACKAGE的話,呢程船係免費的。喺船上面影完幾張相之後,最好訓一陣。50分鐘船程就到兩個港了。去到元箱根港或者箱根町港,兩個港都可以搭巴士返出去箱根湯本站。普通車程約一小時,特急巴士(行公路)的約30分鐘就可以。返到去箱根湯本,行筆者剛才介紹過既手信街,跟住就可以慢慢等火車返東京市。咁就完成一天遊了。


乘車指南:

東京市前往箱根方法:
最方便又平既方法,就係喺新宿小田急電鐡直達小田原(約1小時35分)。再買埋兩天或三天PACKAGE就更抵。兩天PACKAGE只需¥5000,PACKAGE內已經包括新宿箱根湯本既來回車票(只限去及回各一程)以及箱根市內任搭任何交通公具(包括,登山鐡路,登山纜車,大涌谷吊車,海賊船,以及部份巴士)所以就算係你即日來回,買PACKAGE都係抵到爆炸。
買PACKAGE既方法,係去新宿既小田急服務站買。(記住,不是新宿JR站入面果個,而係要去小田急百貨入面既小田急服務站,不過都唔係下圖呢個,呢個係比日本人用的,喺佢左手邊細細間既先係。)




無錯,就係上面藍色呢間了,呢度既職員識講國語同英文,呢度亦有多國語言既旅遊指南比你攞,所以唔怕去到唔識路。而指南入面仲會有上面講過咁多種交通工具既班次添。

另外,如果你買左JR PASS的話,你可以搭JR 湘南新宿線小田原(約1小時12分),再轉小田急就可以去到箱根湯本了。當然又係買PACKAGE最抵啦,小田急出發既兩天PACKAGE係¥3900。



達思怪獅背秀 (ThatsWhy Special)

小田急電鐵箱根,梗係要加錢試下Romance Car啦,Romance Car其實係小田急電鐵既特急車次,全車指定席。最重要既係,有幾部Romance Car車頭係全幅玻璃窗,等你可以睇到沿路既風景。不如睇相啦。







小田急Romance Car既車票可以預早一個月上網book,對住個時間表黎訂就可以好容咁揀到呢款Romance Car架喇。到時仲可以同車長合照添。

小田急電鉄Romance Car預約/查詢空位網址> https://www.web-odakyu.com/e-romancecar/?language=zh&country=TW

 (本文部份相片取自谷歌地圖)


相關文章
箱根篇之 箱根湯本
箱根篇之 強羅
箱根篇之 大涌谷(火山)
箱根篇之 桃源台 (海賊船)

沒有留言:

張貼留言