大家淨係睇紅字得喇，由左至右，由上至下咁睇。景點分別有中山大學、靈興殿、打狗英國領事館、鼓山渡輪碼頭同打狗鐵路博物館。由西子灣捷運站出發計，步行去鼓山渡輪碼頭要5-10分鐘，行去中山大學就15分鐘左右啦。想行去打狗英國領事館既話就太遠了，要拐個大彎先去到，去到仲要行百幾級樓梯上山，所以我一開場已經話，租單車啦。否則搭公車都可以。詳細如下：
中山大學
前往中山大學，必須經過呢條西子灣隧道（唔行隧道既話就沿打狗英國領事館轉個大彎咁上番去吧）。呢條隧道其實都幾黑的，不過都好多人行，唔驚啦。我當時就踩單車入去既。大學範圍係開放式的，大家可以隨意影相，咁當然唔係叫你走入人地既課室啦，想扮下不能說的秘密影下相既，其實呢度唔錯架。不過當時筆者得一個人，又踩住單車，好快就踩過左，唔記得影相。（係我錯吧！！）
離開左中山大學，沿住蓮海路往下踩，沿途係海邊，可以停低影下相，好好風，又靚，心曠神怡。
靈興殿
當大家踩到去一個小花園之後，靠山既一邊就會見到上圖既樓梯，一路行上去就到靈興殿架喇。唔上去既話，我地繼續往下踩，會有另一條樓梯，通往打狗英國領事館的。
打狗英國領事館
打狗英國領事館，係台灣既二級古蹟。當然，呢度係“前”領事館啦，依傢就因為佢既紅磚牆外貌而吸引大家前去影相，想知道更多關於佢既野可以去呢度＞高雄市政府文化局。我地又繼續行程......
從呢條橋行過對面，就係鼓山渡輪碼頭了。
鼓山渡輪碼頭，有船來往旗津，基本上黎得西子灣就一定去埋旗津架喇。渡輪班次非常密，船既上層係載人，下層係載電單車同單車既。咁所以如果你已經喺西子灣租左單車既話，可以帶埋佢上船去旗津。否則既話都唔駛擔心，去到旗津大把單車鋪比你租，仲有電動既家庭式三輪車租添，一家大細非常適合。另外，喺呢度附近有好多食肆，仲有檔好出名既刨冰，臨上船或者玩完返黎可以試下。
打狗鐡路博物館
說實話，呢間博物館就唔係好大，同日本大宮嗰個直情無得比，不過間博物館旁邊有個好似維園咁大既公園，公園內放左幾列古老火車比大家玩。仲要免費入場添。當參觀下無壞。離開左公園，向上踩就會見到上圖既單車徑，沿住踩再轉右就可以去到五福四路（即係上一集鹽埕埔介紹過瑪莉食品嗰條街呀），跟住沿高雄橋可以去番國賓大飯店同中央公園。而今次既行程筆者就係正正從中央公園捷運站門口租單車，一路踩過去再返黎的。原因係老婆大人行之前介紹過既新堀江商圈行左好耐，我實在忍唔住要賣甩佢。=.=”
上面提到，如果唔想行去中山大學，又或者打狗英國領事館既話，係可以搭公車的。公車站在打狗鐵路博物館門口，印象中係無路線編號的，佢會寫住哈瑪星遊覽公車就係架喇。（即西子灣捷運站出口2）
講開西子灣又同大家溫下歷史：
喺高雄你經常會見到“打狗”呢兩隻字，又或者你搭捷運時又會見過“哈瑪星”喎，究竟打狗同哈瑪星點解呢？
打狗 - 其實即係高雄既前名。當年日本人佔領台灣時，問台灣人高雄叫咩名，台灣人就答日本仔“TAKAO”，點知原來日本扶桑町的確有一個地方係叫TAKAO的，而TAKAO既中文寫法就係高雄。咁所以打狗，就變成今時今日既高雄了。
哈瑪星 - 原理同打狗嗰個差唔多，又係日本人改既。西子灣呢個地方以前係鐵路既總站，而由於呢度係近海既關係，所以日本人就叫呢度做臨海線“Harbour Sen”，叫下叫下，台灣人以為日本人叫呢度做“哈瑪星”，所以西子灣又名哈瑪星了。
(本文地圖取材自谷歌地圖；部份相片轉載自高雄市政府文化局)
沒有留言:
張貼留言