我成日都話我係高雄人, 所以總有啲高雄既小知識送比大家啦, 今日講兩樣, 一樣係飲品, 一樣係交通.
高雄推介之一 "古早味紅茶"
拿, 台北出名既野食就有阿給同鐡蛋啦, 台中就有珍珠奶茶丫, 咁高雄有咩出名呢? 吳寶春麵包? No. 答案係 "古早味紅茶". 喺高雄, 你地平時行街見到既街邊飲料檔口, 記住唔好再叫珍珠奶茶喇, 試下叫杯紅茶啦. 高雄既紅茶係用傳統方法同茶葉製造, 所以味道同你平時香港飲既西式紅茶有極大不同. 當地人叫呢種茶做 "古早味紅茶" (其實你叫紅茶即係古早味架喇). 呢杯紅茶有咩咁好飲呢. 首先, 佢無珍珠奶茶咁甜, 無奶丫嘛, 但係又無烏龍茶果種苦苦地既感覺. 呢杯紅茶有種早藥既味道, 飲落有極有茶味之餘仲有D甘甘地既感覺. NT$30 一杯, 一場黎到就記住試下喇!
高雄推介之二 "公車168號線"
雖然高雄係有捷運系統 (2016年仲有輕軌添), 但係高雄捷運得紅, 橙兩條線, 好多景點同埋酒店根本就照顧唔到. 所以筆者今日就推介一條巴士線比你, 就係公車168號線了.
其實168號線分為168東同168西兩條線, 睇上圖你就明白, 168東指順時針方向行, 而168西就係逆時針方向行. 朝早五點幾開到晚上十點. 班次一般為15分鐘左右一班, 收費係NT$20.
等我解釋下上圖啦, 168公車會經過好多筆者介紹過既旅遊點, 例如愛河, 國賓大飯店, 漢來大飯店, 漢神巨蛋, 85大樓(可步行到大遠百), 夢時代, 舊市議會(可步行到六合夜市). 你話係咪方便呢? 喺每個巴士站都會有上圖既路線指示, 睇清楚圖入面寫住東定西(又或者睇箭咀)就會你知有冇企錯方向搭車, 企錯左唔駛驚, 行過對面馬路一定有對頭站的. 無分叉路的. 一般黎講, 高雄市就好少塞車既. (除左高雄車站對開既馬路, 不過好彩呢條線唔經.) 咁所以下次去到高雄, 咁岩你住正國賓既話, 就試下搭168東去巨蛋喇, 快過你行餐死再搭捷運呀.
達思怪獅背秀 (ThatsWhy Special)
大家喺高雄行街, 有冇發覺高雄係無咪錶既呢? 咁高雄既駕車人士點泊車呢? 答案好簡單, 就係唔係入錶喇!! 咁好?? 其實係咁的, 高雄既路邊有指定既泊車位置, 當你泊好部車之後, 有交通警巡邏時就會放張發票起你車頭度, 好似香港抄牌咁. 你只需要下次經過7-11時交左張單佢就可以, 當地人話泊車好平架喎, 恕我無追問落去喇. 咁如果無交通警經過咁又點呢? 恭喜你, 你可以獲得免費泊車一次!!! 正喎!! 咁你話高雄人仲點會違例泊車丫?
不過咁, 有權利就有義務. 萬一你咁唔好彩, 搵唔到個指定泊車位, 而求其泊低左部車咁點算呢? 你放心, 高雄無抄牌呢回事的. 所以交通警會直接拖走你部車佢而不事先通知. 咁你下次去到高雄而咁岩租車渣既話, 就記住搵個指定泊車位泊車喇.
(註: 本文部份相片取自高雄市公共汔車管理處網站)
沒有留言:
張貼留言