漢神巨蛋 + 瑞豐夜市

去完義大世界，今日介紹一個可以夜晚先去既地方，就係巨蛋捷運站了。巨蛋站有兩大旅遊點，一個係漢神巨蛋百貨，另一個係全高雄最大既夜市，瑞豐夜市。

去漢神巨蛋好方便，只要搭捷運紅線到巨蛋站，出口5，一路向北就見到 (如上圖)。喺漢神巨蛋既旁邊就係高雄紅館　－　高雄現代綜合體育館 (高雄巨蛋)，睇演唱會就係呢度喇。

喺巨蛋門外有個噴泉。

過左噴泉之後你就會見到個入口，無錯，係落地底入的，不過扶手梯呢個位置係露天的，一定見到架。

至於點解去高雄要去漢神巨蛋呢？呢度有好多台灣獨家既商號亦有高雄唯一個HANDS TAILUNG 台隆手創館 (即係日本既TOKYO HANDS呀)，筆者就最鍾意行喇。

另外，呢度仲有個幾大既FOOD COURT，行到攰，可以食埋飯先走, 話明係FOOD COURT，唔貴的。當中仲有去到台灣必試既　－　高雄空廚。

高雄空廚係做飛機餐的，後來因為太受歡迎所以開埋食店，所以你會食到飛機上見到既蛋糕同杯裝橙汁。而上圖既蛋包飯亦係好出名的，記得試下喇！！

瑞豐夜市

去完漢神巨蛋之後，點可以唔行埋去瑞豐夜市呢？瑞豐夜市係全高雄最大既夜市，有食肆、有好多買衫、飾物、手機貼、塔羅占卜、夾公仔同玩灘位遊戲. 去既方法好簡單，如果你搭捷運既話，就由出口1，向前行3分鐘就到。如果由漢神巨蛋出發既話，可以沿上圖捷運站既方法行，又或者學筆者咁，由巨蛋後面新榮街轉過去。

呢度有幾樣野係好難忘的，首先係超平既細肉燥飯，三十蚊新台幣咋，食個飯打底再掃街就一流。跟住就係塔羅占卜，好準！去既朋友一定要試下，大約一百蚊港幣左右已經可以任問１５分鐘。


最後提提大家兩個要點：

第一，如果你係搭公車（由南至北）咁去漢神巨蛋的話，記住要喺“漢神巨蛋”站落車，唔係“巨蛋捷運站”落，行少好多架。

第二，瑞豐夜市逢一、三休息的。Plan行程時小心留意下呀！


(本文地圖取材自高雄捷運網站)