早幾日簡介左高雄究竟有咩好去處. 今日我地先去義大世界玩下先啦, 話晒義大世界喺高雄黎講都係新景點, 落成兩年左右, 亦係台灣中南部唯一既大型主題遊樂場連大型商場連酒店! 仲勁過香港迪士尼, 你都咪話唔勁!! 但係如果淨係講遊樂場面積既話, 就大約係香港迪士尼既一半. 唔細架喇, 香港無得玩既呢度都有齊. 一齊黎啦!
先講下點去義大世界先, 大家可以搭高鐵(由台北至台南), 或者搭捷運, 黎到左營站. 又或者搭台鐵(台東至台北沿線), 到新左營站落車. 跟住你就會見到彩虹市集.
喺彩虹市集既對出, 你就會見到公車站架喇. 公車編號係8501, 班次約為20分鐘一班, 車程約20分鐘, 車資為TWD$37. 部份班次會以佛光山為總站, 不過唔怕, 佢都會經義大世界的, 唔放心既話, 上車問一問司機就可以, 反正你都要佢提你落車架啦.
到左義大世界, 呢度會分兩個落車站, 一個係皇冠飯店, 一個係義大遊樂世界. 其實兩個站相隔唔遠, 行都行到, 不過, 如果你拎住行李既話, 就梗係返酒店先啦. 我地依傢先去義大遊樂世界.
一落車, 你對面就會見到呢座 義大皇家劇院. 呢個係遊樂場既一部份, 不過要另外比錢的. 樂園入口喺商場入面, 我地一齊行喇....
沿途仲有手信買, 不過, 梗係玩完先買啦.
終於黎到入口, 好似去左冒險樂園咁, 不過你無去錯. 行埋去買飛, 之後就入得場.
入場了, 筆者去既時候買成人票係送埋義大摩天輪一次的.
依傢唔知有冇了.
成人票價: NT$899
營業時間: 週一至日: 09:00 ~
17:30
連埋劇場, 呢個遊樂場共分5個園區 (好細架咋!), 大衛城, 聖托里尼山城, 特洛伊城堡同摩天輪. 不過其實摩天輪既位置係喺商場既頂樓, 要離開左遊樂場, 穿過商場行到尾先到, 所以可以玩既只得三個園區.
首先, 當你入到園區, 第一個就係大衛城, 呢度有兩層加室外. 有4D立體影館, 單軌火車(來往特洛伊城堡), 另外最刺激既就要出室外了, 叫 "天旋地轉"!!!
呢個天旋地轉, 唔知大家當年有冇好似筆者一樣, 喺添馬嘉年華既時候排餐死都要玩喇. 呢個遊戲, 你要坐喺一張雙腳離地既座位度, 好似洗衣機咁, 360度不停咁轉轉轉. 玩過既我唔多作介紹喇,未玩過既自己試下啦.
跟住旁邊既就係聖托里尼山城, 呢度基本上係飲食同買記念品既店鋪, 室外有跳樓機!! 室內係一個遊戲機中心.
再往前行你就會見到呢隻大馬!, 之後就到機動遊戲既集中地, 特洛伊城堡. 呢度有碰碰車, 海盜船, 鬼屋, 同埋過山車, 仲有模擬飛行既飛越台灣, 總之好玩!!
玩完義大遊樂世界之後, 就返到商場喇, 呢個商場好大, 應該有沙田新城市商場咁大. 不過呢度由於係酒店遊樂區既關係, 所以店鋪以名牌為主, 香港有既呢度都有......
除左名店, 呢度連包都大過人, 電視有介紹過架, 不過我食唔落, 無買到. 呵呵.
好喇, 商場都行埋, 咁就上頂樓既摩天輪喇. 呢度可以一眼睇晒高雄市(如果你有望遠鏡既話), 當然仲可以睇晒成個義大世界啦, 去相!!
達思怪獅背秀 (ThatsWhy Special)
由於筆者去義大遊樂世界既時候係送埋摩天輪既關係, 所以我推薦大家先去左遊樂場玩夠本, 食到飽先行商場都未遲, 夜晚玩摩天輪仲浪漫啦. 另外既就係, 唔好睇個遊樂場好似細細咁, 呢度樣樣刺激既機動遊戲都要排隊排成個鐘或以上. 所以淨係玩晒佢都花你大半日, 早少少黎, 玩到傍晚左右, 再行陣商場, 行到最尾近酒店位置上頂樓, 就可以玩埋摩天輪, 跟住落番地下, 就有公車站, 返番高雄咁就岩岩好了.
(本文部份相片取自義大世界官方網頁)
沒有留言:
張貼留言